Óńirlerge 4,4 mln doza vaktsına jetkizdik – «SQ-Farmatsııa» basshysy
Bul týraly kompanııanyń basqarma tóraǵasy Erhat Esqalıev ortalyq kommýnıkatsııalar qyzmetinde ótken brıfıngide aıtty.
«SQ-Farmatsııa» JShS biryńǵaı dıstrıbıýtor retinde tegin medıtsınalyq kómektiń kepildendirilgen kólemi men mindetti medıtsınalyq áleýmettik saqtandyrý júıesi sheńberinde medıtsınalyq uıymdar men respýblıka halqyn dárilik zattarmen qamtamasyz etip otyr. 2020 jyldyń 1 qańtarynan bastap MÁMS engizilýimen 700 myńǵa jýyq saqtandyrylǵan halyq ambýlatorııalyq deńgeıde tegin dári-dármek aldy», - dedi «SQ-Farmatsııa» basshysy.
Sondaı-aq, koronavırýsqa qarsy vaktsınanyń tórt túrin tańdaý múmkindigi bar ekenin eske saldy.
«Spýtnık V» vaktsınasynyń 10 mıllıon 280 myń dozasy satyp alyndy, Onyń ishinde aǵymdaǵy jyldyń 1 aqpanynan bastap óńirlerge birinshi komponenttiń 1,9 mln dozasy jáne ekinshi komponenttiń 14 mln. dozasy jóneltildi. 10 maýsymǵa deıin birinshi komponenttiń 1 mln 200 myń dozasyn jáne ekinshi komponenttiń 525 myń dozasyn jóneltý aıaqtalady», - degen Erhat Esqalıev QazVac vaktsınasynyń 2 mln dozasyn satyp alǵanyn aıtty.
«Óńirlerge otandyq vaktsınanyń 100 myń dozasy jetkizildi. Kelesi jetkizilim maýsym aıynyń sońyna deıin josparlanǵan. Hayat-Vax-tyń 1 mln dozasy satyp alyndy jáne óńirlerge jóneltildi. Budan basqa, Sinovac Biotech kompanııasy óndiretin Coronavac vaktsınasynyń 500 myń dozasy satyp alyndy. Óńirlerge 12 maýsymnan keıin jóneltiledi», - dedi biryńǵaı dıstrıbıýter basshysy.
Erhat Esqalıevtiń málimetinshe, búgingi tańda óńirlerge COVID-19 vaktsınasynyń 4 mln 400 dozasy jetkizilgen.
«Vaktsınalardy aımaqtarǵa bólý Densaýlyq saqtaý mınıstrligi sanıtarlyq-epıdemıologııalyq baqylaý komıtetiniń tapsyrysy boıynsha júzege asyrylady», - dedi «SQ-Farmatsııa» basshysy.