Óńirlerdiń damý serpini boıynsha endi 17 aımaqta baqylaý júrgiziledi - Súleımenov

ASTANA. QazAqparat - Óńirlerdiń damý serpini boıynsha 17 aımaqta baqylaý júrgiziletin bolady. Bul týraly búgin Úkimet otyrysynda qańtar-maýsymdaǵy elimizdiń áleýmettik-ekonomıkalyq damý qorytyndylary týraly baıandaǵan QR Ulttyq ekonomıka mınıstri Tımýr Súleımenov aıtty, dep habarlaıdy QazAqparat tilshisi.

«Óńirlik bóliniste ekonomıkanyń barlyq derlik salalarynda oń ósim baıqalady. Endi óńirlerdiń damý serpini boıynsha 16 aımaqtyń ornyna 17 óńirde baqylaý júrgiziletinin aıta ketkim keledi. Ónerkásipte 3 óńirden basqa (Batys-Qazaqstan (-1,4%), Túrkistan (-3,9%) jáne Qyzylorda (-4,7%) barlyq óńirler ósim kórsetip otyr. 8 óńirde 1,2 paıyzdan 4,6 paıyzǵa deıin óse otyryp, respýblıkalyq mánnen (5,2%) tómen tirkelgen (Mańǵystaý, SQO, Astana, Qaraǵandy, Shymkent, Almaty, Pavlodar)», - dedi ol.

Mınıstrdiń aıtýynsha, aýyl sharýashylyǵynda barlyq óńirler ósýdiń oń úrdisin saqtap qaldy. Alaıda 7 óńir respýblıkalyq deńgeıden (4,0%) tómen qarqyndy kórsetti. Atap aıtqanda Atyraý, Qyzylorda, Almaty, BQO, Qaraǵandy, Aqmola, SQO-da ósim 2,5-ten 3,6 paıyzǵa deıin bolyp otyr.

«Qurylys boıynsha Astana men Atyraý qalys qalýda. Bul rette Astana qalasyndaǵy ahýal ótken aımen salystyrǵanda jaqsaryp, teris mán -22,8 paıyzdan -11,2 paıyzǵa deıin qysqardy. Investıtsııalar boıynsha barlyq óńirlerlerde ınvestıtsııalyq jaǵdaıdyń jaqsarýy baıqalady. Aǵymdaǵy jylǵy alty aıdyń qorytyndylary boıynsha plıýstik aımaqqa Mańǵystaý men Pavlodar oblystary tıisinshe 6,0 paıyz jáne 2,0 paıyz ósimmen shyqty», - dedi Tımýr Súleımenov.