Óńirlerdiń áleýmettik-ekonomıkalyq damý reıtıngisiniń kórsetkishter tizbesi 47-den 23-ke deıin qysqardy - QR Statıstıka agenttigi

ASTANA. 14 qarasha. QazAqparat - Óńirlerdiń áleýmettik-ekonomıkalyq damý reıtıngisiniń kórsetkishter tizbesi 47-den 23-ke deıin qysqardy. Bul týraly búgin Astanada ótken baspasóz máslıhatynda atalǵan agenttiktiń basshysy Álıhan Smaıylov málim etti.

«11 qazanda Úkimettiń keńeıtilgen otyrysynda Elbasy QR Statıstıka agenttigine óńirlerdiń áleýmettik-ekonomıkalyq damý reıtıngisiniń aıasynda kórsetkishterdi qaıta qarap, qysqartyp, ońtaılandyrý boıynsha tapsyrma bergen bolatyn. Osy tapsyrmany biz búginde oryndadyq», - dedi Á. Smaıylov. Agenttik basshysynyń sózine qaraǵanda, tıisti usynystar óńirlerdiń barlyq ákimdikterinen jınalyp, tıisti memlekettik organdarmen talqylaýlar júrgizildi. «Qazirgi tańda jańa ádispen reıtıngige qatysty kórsetkishterdiń tizimin bekitip, málimetterdi QR Prezıdenti Ákimshiligine jiberdik. Nátıjesinde, óńirlerdiń áleýmettik-ekonomıkalyq damý reıtıngisiniń kórsetkishter tizbesi 47-den 23-ke deıin eki ese qysqardy», - dedi Á. Smaıylov. Onyń aıtýynsha, buǵan deıin agenttik qalyptastyrǵan reıtıngte óńirdiń áleýmettik-ekonomıkalyq, demografııalyq damýynyń kórsetkishteri qamtylǵan bolatyn. Osy tizimdi qaıta qarastyrý kezinde óńir ákimderiniń qyzmetin tikeleı kórsetetin kórsetkishter qaldyryldy. Atap aıtqanda, bul tizbede ákimder jumysynyń nátıjesin aıqyndaıtyn talaptar eskerilgen.