Óńirlerdi gazdandyrý jumysyna qosymsha 50,1 mlrd teńge bólindi

NUR-SULTAN. QazAqparat – Bıyl el óńirlerin gazdandyrý jumysyna 95 mlrd teńgeden astam qarajat jumsalýy kerek. Onyń 50,1 mlrd teńgesi bıýdjetti naqtylaý aıasynda qosymsha bólinip otyr, dep habarlaıdy QazAqparat tilshisi.

Májiliste ótken Úkimet saǵatynda QR Energetıka mınıstri Bolat Aqsholaqov osyndaı málimet aıtty.

«Búgingi tańda ishki gaz tutynýdyń kúrt ósýine jáne eldi odan ári úzdiksiz gazdandyrý úshin gaz tasymaldaý júıesin jańǵyrtý qajettiligine baılanysty búgingi tańda mınıstrlik «QazaqGazben» birlesip gazdandyrýdyń bas shemasyn jańartyp jatyr jáne ol aıaqtalý satysynda.

«Amanat» partııasynyń Jol kartasy aıasynda mınıstrlikke 2 tarmaq bekitilgen. 2021 jyldyń qorytyndysy boıynsha 68 myń adamdy gazben qamtamasyz etý josparlanǵan bolatyn. Jyl sońynda 165,9 myń adam gazǵa qol jetkizdi.

Jalpy, 2021 jylǵa arnalǵan gazdandyrýdyń josparlyq kórsetkishi 53,71% bolsa, naqty deńgeı 57,67%-dy qurady», - dedi Bolat Aqsholaqov.

Onyń aıtýyna qaraǵanda, 2025 jylǵa deıin bıýdjet esebinen 246 aýyldy gazben qamtamasyz etý josparlanǵan. Ázirge, sol jospar aıasynda 187 eldi mekendi gazdandyrýǵa qarajat bólingen.

«Bıyl eldi gazdandyrýǵa respýblıkalyq bıýdjetten 45,8 mlrd teńge bólindi. Sondaı-aq, 2022 jylǵa arnalǵan respýblıkalyq bıýdjetti naqtylaý sheńberinde qosymsha 50,1 mlrd teńge qoldaý tapty. Nátıjesinde, 133 jobany iske asyrýǵa 96 mlrd teńge qarastyrylǵan. Bul 146 myń adamdy nemese 93 eldi mekendi gazben qamtamasyz etýge múmkindik beredi. 2022 jyldyń qorytyndysy boıynsha gazdandyrýdyń josparlanǵan deńgeıi 58,43%-dy quraýy kerek», - dedi mınıstr.

Buǵan deıin QR Energetıka mınıstrligi Reseıden gaz tartý úshin shekaralas oblystardyń qajettilikterin zerttep jatqandaryn habarlaǵan edi.