Óńirlerdi damytýda tıisti qadamdardy eskerý kerek - Esep komıteti
«Óńirlerdi damytý jumystary arasynda da teńsizdik qysqarmaı, kerisinshe ulǵaıyp otyr. Óńirlerdiń teńgerimdi damýyn qamtamasyz etýge halyqtyń ómir súrý jaǵdaıyn jáne bıýdjettik qamtamasyz etilýin teńestirýge baǵyttalǵan keshendi óńirlik saıasat qalyptasqan joq. Onyń ústine, óńirlerdi damytýdyń memlekettik baǵdarlamasynda basymdyqqa ıe óńirler ekonomıkasynyń naqty sektoryn damytýǵa emes, oǵan baılanysty protsesterge berilgen», - dedi ol 2018 jylǵy respýblıkalyq bıýdjettiń atqarylýyn talqylaý barysynda.
Onyń sózine qaraǵanda, atalǵan baǵdarlamaǵa júrgizilgen taldaýǵa sáıkes, bólinetin qarjynyń 95 paıyzyna jýyǵy ınfraqurylym, kommýnaldyq máselelerge qatysty baǵyttalyp otyr. Al óńirlerdi naqty damytý máselesinde tıisti qadamdar tys qalyp otyr. Bul turǵyda jaýapty mınıstrlikterdi baqylaýǵa alýy kerek.
Budan bólek ol kvazımemlekettik sektorǵa toqtala kele, bul saladaǵy shyǵyndar áleýmettik-ekonomıkalyq qaıtarymnan edáýir asyp ketkenin jetkizdi.
«Sýbektilerdiń menshiginde qalyp otyrǵan taza kiris bóligin paıdalanýdyń naqty tetikteri men maqsattary olardyń nátıjeliligi men sýbektiniń qarjylyq derbestigine áseri aıqyndalmaǵan. Bul rette qoldanystaǵy zańnama dıvıdentterdiń mólsherlerin belgileýmen nemese olardy tólemnen bosatýmen, sondaı-aq materıaldyq-tehnıkalyq bazany damytýǵa jáne jetildirýge arnalǵan taza kiris bóliginiń paıdalanylýy boıynsha sharttarmen ǵana shektelip otyr. Onyń úsitine, aktsııalardyń memlekettik paketine dıvıdentter esepteý bóliginde birizdiliktiń bolmaýy - aktsıoner retinde memleket múddelerin bildiretin memorgandardyń aktsııalarǵa dıvıdentterdi esepteý týraly sheshimder qabyldaýda ártúrli tásilderdi qoldanýǵa ákep soqtyrýda», - dedi N. Nurjanov.