Óńirlerdi damytý baǵdarlamasy aıasynda 350 myń sharshy metrge jýyq baspana paıdalanýǵa berildi

ASTANA. QazAqparat - Óńirlerdi damytýdyń 2020 jylǵa deıingi baǵdarlamasy aıasynda 344 myń sharshy metr baspana paıdalanýǵa berildi. Bul týraly búgin Ortalyq kommýnıkatsııalar qyzmetindegi baspasóz máslıhatynda «Samuryq-Qazyna» jyljymaıtyn múlik qory» AQ basqarma tóraǵasy Bolat Palymbetov málim etti.

«Samuryq-Qazyna» jyljymaıtyn múlik qory Óńirlerdi damytýdyń 2020 jylǵa deıingi baǵdarlamasy aıasynda jeke kompanııalarmen seriktestik ornatyp, shamamen 585 myń sharshy metr turǵyn úı (10 255 páter) qurylysyn júrgizýde, sonyń ishinde 472 myń sharshy metr (8 286 páter) «Samuryq-Qazyna» jyljymaıtyn múlik qoryna tıesili», - dep toqtaldy ol.

B. Palymbetovtyń sózine qaraǵanda, búginde aýdany 344 myń sharshy metr baspana paıdalanýǵa berildi, onyń 267 myń sharshy metri nemese 5 063 páter Jyljymaıtyn múlik qoryna tıesili.

Sonymen qatar ol qor jergilikti qurylys kompanııalarymen tyǵyz yntymaqtastyqta turǵyn úıler salyp, óńirlerdi damytýǵa belsendi qatysyp otyrǵandyǵyn aıta kele, atalǵan baǵdarlamany júzege asyrý aıasynda Jyljymaıtyn múlik qory elimizdiń 11 óńirindegi qurylystar tórt myńnan astam jumys oryndaryn ashqanyn jetkizdi.