Óńirlerdegi qurylys jumystaryn jergilikti kompanııalar ǵana júrgizýi múmkin - mınıstrlik
Búgin Senattaǵy Úkimet otyrysynan keıin tilshiler vıtse-mınıstrden qurylys nysandaryn salýda bir kompanııanyń konkýrstardyń kóbisin utyp alýy oqıǵalarynyń jıi kezdesip jatqany týraly surady.
«Qurlys jáne memlekettik satyp alý salasyn reformalaý aıasynda Indýstrııa mınıstrligi men Qarjy mınıstrligi birlese tıisti usynystardy daıarlady. Bul turǵyda atalǵan kompanııalarǵa qatysty naqty shekteý tetikteri bolýy kerek. Bir kompanııa óziniń qarjylyq, tehnıkalyq jáne basqa da qurylymdaryna qaraı óz mindettemelerin oryndaı alady. Atap aıtqanda, keı kezde bir kompanııa óziniń múmkindigin eskermeı, júzege asyra almaıtyn qurylys nysandary boıynsha konkýrstardy utyp jatady. Osynyń saldarynan sapaǵa mán berilmeı, qurylysy aıaqtalmaı qalǵan nysandar sany kóbeıedi», - dedi E. Daýylbaev.
Onyń aıtýynsha, Qarjy mınıstrligi óńirlerdegi jergilikti kompanııalar úshin qosymsha yntalandyrý tetikterin iske qosýdy usynyp otyr.
«Eger kompanııa elimizdiń ońtústik óńirinde bola tura batys oblystardaǵy tenderge qatyssa, olar ózderiniń tehnıkasyn batysqa súırep aparmaıtyny túsinikti. Osy oraıda bul kompanııa jergilikti qurylys kompanııalary men tapsyrys berýshi arasynda deldal retinde qatysa salýy múmkin. Sondyqtan Qarjy mınıstrligi jergilikti qurylys kompanııalaryn yntalandyrý qadamdaryn usynyp otyr. ıAǵnı, konkýrsqa jergilikti jáne basqa óńirdiń kompanııasy qatyssa, onda qurylys júrgiziletin oblystaǵy jergilikti kompanııaǵa basymdyq beriletin bolady», - dedi vıtse-mınıstr.
Budan buryn habarlanǵandaı, Senat depýtaty Serik Shaıdarov turǵyn úı qurylysy salasynyń damýyn tejeıtin júıeli problemalardy ataǵan edi.
«Qurylys salasyndaǵy memlekettik satyp alý tetigi jetildirilmegen. Búgingi tańda, bir kompanııa eldiń ártúrli aımaqtaryndaǵy birneshe konkýrstardyń jeńimpazy retinde anyqtalýy múmkin. Bul jaǵdaıda jumystyń kóp bóligi keıinnen qosalqy merdigerlikke, keıde kóp satyly qosalqy merdigerlikke beriledi. Osyndaı tájirıbe merdigerlerdiń kelisimshart mindettemelerin oryndamaýyna, qurylys sapasynyń tómendeýine, sondaı-aq bir qosalqy merdigerden ekinshisine baǵanyń ósýine ákeledi. Osynyń saldarynan nysandar konservatsııalanady, ishinara buzylady. Bul óz kezeginde osy nysandardy aıaqtaýǵa nemese qalpyna keltirýge qosymsha qarajat izdeýge májbúr etedi», - dedi senator.
Onyń paıymynsha, bir kompanııanyń konkýrstarǵa qatysýyna jáne jeńýine avtomattandyrylǵan lımıtterdi belgileý arqyly tsıfrlandyrýdy tereńdetý qajet.