Óńirlerdegi áıelder isteri jónindegi komıssııalardyń rólin arttyrý kerek - L. Súleımen

ASTANA. QazAqparat - Óńirlerdegi problemalardy tıimdi sheshý úshin aımaqtardaǵy áıelder isteri jónindegi komıssııalardyń rólin arttyrý kerek. Búgin QR Memlekettik hatshysy Gúlshara Ábdiqalyqovanyń jetekshiligimen ótken QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysynda komıssııa múshesi Lázzat Súleımen osylaı málimdedi.

Eske sala keteıik, ulttyq komıssııa otyrysynda 2006-2016 jyldarǵa arnalǵan Genderlik teńdik strategııasyn iske asyrý boıynsha Aqmola oblystyq ákimdiginiń qabyldap jatqan sharalary talqylanǵan bolatyn.

«Bizdiń komıssııanyń birden bir maqsaty - jergilikti jerlerdegi, sonyń ishinde oblystyq komıssııalardyń jumysyn jandandyrý bolyp tabylady. Bul bir jaǵynan qazir elimizde belsendiligi arta túsken ózin-ózi basqarýdyń bir úlgisi bolsa, ekinshi jaǵynan názikjandy belsendilerdi jergilikti problemalardy sheshýge tartý qoǵam men bılik arasyndaǵy baılanysty tereńdete alady der edim. Bul jergilikti problemalardyń oń sheshim tabýyna da ıgi yqpal etedi», - dedi Lázzat Súleımen jýrnalısterge bergen suhbatynda.

Onyń aıtýynsha, názik jandylardyń ekonomıkalyq jáne saıası belsendiligin arttyrý, olardy qoǵam isine aralastyrý baǵytynda Áıelder isteri jáne otbasylyq-demografııalyq saıasat jónindegi ulttyq komıssııanyń áleýeti zor. Budan bólek, qoǵamdaǵy otbasy, áıelder men balalardyń múddelerin qorǵaý máseleleri aıasynda ózekti áleýmettik problemalardy sheshý úshin komıssıa naqty jumystar atqarýy qajet.

«Ásirese, áıelderdiń densaýlyǵy men olarǵa qatysty zorlyq-zombylyqtyń aldyn alýda kóptegen sharalar qabyldanýy kerek. Al óńirdegi komıssııalar osy maqsatty kózdep, naqty baǵyttarmen jumys jasaıtyn bolsa, onda qoǵamdaǵy keleńsizdikterdiń aldyn alýǵa bolatyn edi dep esepteımiz. Bul úshin de eń aldymen óńirlik komıssııalardyń rólin arttyrý kerek», - dedi L. Súleımen.