Óńirlerdegi 220 sheshim qabyldaý ortalyǵynyń 17-si ǵana qalady – Ashat Aımaǵambetov
«Bul máseleni birneshe ret talqylaǵan bolatynbyz. Tek qana oblystyq bilim basqarmasy deńgeıinde ǵana emes, aýdandyq, qalalyq bilim bólimderiniń basshylary da qatysty jáne sizder kelisý úshin arnaıy jobany da joldadyq. Bul másele Memleket basshysynyń Joldaýda bergen tapsyrmasynyń aıasynda iske asyrylyp jatyr. Óte mańyzdy reforma. Jalpy sarapshylar kópten beri osy máseleni kóterip júrgenin bilesizder. Eń basty maqsat – bilim sapasyn arttyrý, birizdilikpen qarjylandyrý jáne basqarý problemalaryn sheshý. Munyń aldynda óńirlerde sheshim qabyldaý ortalyqtary 220-dan astam bolsa, endi munan keıin kelesi jyldyń 1 qańtarynan bastap 17 bolady. Jalpy bıýdjet te oblys deńgeıinde ortalyqtandyrylady. Oblystyq bıýdjetten mektepter, balabaqshalar qarjylandyrylady», - dedi mınıstr vedomstvonyń apparat jınalysynda.
Onyń atap ótýinshe, bul materıaldyq-tehnıkalyq bazany nyǵaıtýǵa, apatty jaǵdaıdaǵy, úsh aýysymdy mektepterdi jáne bilim salasyndaǵy basqa da problemalardy sheshýge septigin tıgizetin bolady.
«Endi muny durystap, kezeń-kezeńimen júzege asyrý kerek. Kelesi jylǵy bıýdjetti aýdandyq deńgeıden oblystyq deńgeıge bergen kezde ártúrli problemalar bolmaýy úshin qazirden bastap bilim basqarmalary baqylaýyna alýy kerek. Birneshe ret jınalys ótkizildi. Óńirler bul máseleni biledi. Baqylaýda ustaý kerek», - Ashat Aımaǵambetov.
Apparat jınalysynda QR Bilim jáne ǵylym vıtse-mınıstri Bıbigúl Asylova 2021 jyldyń qańtardan bastap bilim salasyn basqarý júıesi ózgeretinin, oǵan sáıkes aýdandyq jáne qalalyq bilim bólimderiniń basshylaryn oblystyq bilim basqarmasynyń basshysy taǵaıyndaıtynyn jazǵan edik.