Óńirlerde mınıstrlik kúnderi uıymdastyrylady – Aıda Balaeva
«Memlekettiń negizgi ıdeologııalyq organdarynyń biri retinde bizdiń mınıstrlikke júkteletin mindetterdiń orny erekshe. Vedomstvo tikeleı jaýap beretin eki úlken baǵyt: aqparattyq saıasat pen qoǵamdyq qatynastar. Ekeýi de el Prezıdenti erekshe senip tapsyrǵan, jaýapkershiligi mol san túrli saladan turady. Eń bastysy – eldiń rýhanı kemeldigi men saıası turaqtylyǵy, qoǵamdyq berekesi men bastaǵan isiniń baıandylyǵy kóp jaǵdaıda osy bizdiń mınıstrliktiń jumysyna baılanysty. Bul jaýapkershilikti biz jaqsy túsinemiz, salmaǵyn sezinemiz», - dedi A. Balaeva mınıstrliktiń keńeıtilgen alqa májilisinde.
Osy oraıda ol aldaǵy aptadan bastap qandaı is-sharalar uıymdastyrylatynyn aıtty.
«Dese de, bul týraly halyqtyń, ásirese, óńirlerdegi jurtshylyqtyń keńinen bilip, bar máselemen bóliskeni durys. Sol sebepti, kelesi aptadan bastap el aldyna shyǵyp, onlaın/oflaın formattarda «óńirlerdegi mınıstrlik kúnderin» uıymdastyrýdy josparlap otyrmyz», - dedi vedomstvo basshysy.
«Barshańyzǵa málim, Memleket basshysy Qasym-Jomart Kemelulynyń «Halyqtyń únine qulaq asatyn memleket» tujyrymyn qalyptastyrý – árbir memlekettik organnyń tikeleı mindeti. Árıne, bul kontseptsııa memleket tek «tyńdaýshy» ǵana emes, qajet aqparatqa jalpaq jurttyń qolyn jetkizip, árdaıym ózara baılanysta bolýdy kózdeıdi. Bunyń bári, sóz joq, halyqqa bir taban jaqyndaýda 2020 jylǵa beretin oń baǵa dep bilemin», - dedi A. Balaeva.