Óńirlerde kómir baǵasy qansha teńgege arzandaıdy
«Arnaıy memorandýmdarǵa qol qoıylǵannan keıin kómir baǵasy birqatar óńirde tómendeıdi dep josparlap otyrmyz. Ortasha eseppen Aqmola oblysynda kómir baǵasy 16 paıyzǵa nemese 2 200 teńgege deıin tómendeýi múmkin. Máselen, Makınsk qalasynda 14 myńnan 11 700 teńge deıin, ıaǵnı 2300 teńgege arzandaýy yqtımal. Şýche qalasynda 13 300-den 11 450 teńgege deıin arzandaıdy»,- dedi ol.
Mınıstrdiń aıtýynsha, Almaty oblysynda kómir quny tonnasy úshin ortasha eseppen 3 myń teńgege deıin túsetin bolady. Aıtalyq, Panfılov aýdanynda 16 myń teńgeden 12 900 teńgege deıin, Qarasaı aýdanynda 14 500 teńgeden 11 400 teńgege deıin, Úshtóbe qalasynda 13 400 teńgeden 11 900 teńgege deıin tómendeıdi.
«Soltústik Qazaqstan oblysynda kómir baǵasy ortasha eseppen 16 paıyzǵa nemese 2100 teńgege deıin arzandaıdy. Shymkent qalasynda búgingi kúni 14 700 teńge bolsa, endigi ýaqytta 17 paıyzǵa, ıaǵnı 12 150 teńgege deıin tómendeýi kerek. Memorandýmdarǵa qol qoıýdyń nátıjesinde respýblıkanyń temirjol qoımalarynda Shubarkól kómiri qunynyń tómendeýi ortasha 15-20 paıyzdy qurady. Búgingi kúni mundaı jumystarǵa Qarajyra da, Maıkúbi de kelisip, tómendetýge daıyn bolyp otyr. Endi ákimdikter eki kúnniń ishinde memorandýmdarǵa qatysty jumystaryn tolyq aıaqtaýy qajet»,- dedi Jeńis Qasymbek.
Eske salaıyq, búgin Úkimettiń selektorlyq rejimdegi otyrysynda Investıtsııalar jáne damý mınıstri qolǵa alynǵan jumystardyń nátıjesinde halyqqa jetkiziletin kómir baǵasy 2,5 - 3 myń teńgege arzandaıtynyn jáne buǵan qalaı qol jetkiziletinin aıtty.
Al Premer-Mınıstr Baqytjan Saǵyntaev kómir qunyn arzandatý turǵysynda Úkimet óz jumysyn atqarǵanyn, endigide, olardyń halyqqa jetkizilýi ákimderge baılanysty ekendigin atap ótti.