Óńirlerde kókónisterge taýarlyq ınterventsııalar bastalady

ASTANA. QazAqparat - Premer-Mınıstrdiń orynbasary – saýda jáne ıntegratsııa mınıstri Serik Jumanǵarınniń tóraǵalyǵymen ótken jedel keńeste ákimdikterge áleýmettik mańyzy bar kókónis qorlaryna brondy alyp tastaý shemasy usynyldy, dep habarlaıdy QazAqparat Úkimettiń saıtyna silteme jasap.

Saýda jáne ıntegratsııa birinshi vıtse-mınıstri Arman Shaqqalıev aıtqandaı, osy aptada óńirlik komıssııalar, birinshi kezekte pııazǵa, odan keıin sábiz, kartop, qyryqqabat boıynsha, kólemderin, baǵasyn, sharttary men saýda núktelerin aıqyndaı otyryp, taýarlyq ınterventsııalardy ótkizý týraly sheshim qabyldaýy tıis. Baqylaý-kassalyq apparattardy paıdalaný mindetti bolýy qajet. Taýar ınterventsııalarynyń uzaqtyǵy – aqpannan sáýirge deıin. Negizgi sharttardyń biri – bólshek saýda baǵasy qol qoıylǵan kelisim-sharttar sheńberinde bolýy kerek.

Aýyl sharýashylyǵy vıtse-mınıstri Baǵlan Bekbaýov jarııalaǵan ákimdikterdiń naqtylanǵan derekterine sáıkes, el boıynsha pııaz qorynyń deńgeıi 130%, kartop 118%, sábiz 103%, qyryqqabat 74%-dy quraıdy. Aýyl sharýashylyǵy mınıstrligi óńirlerge satyp alý úshin usynǵan qorlardyń deńgeıi maýsymaralyq qajettilikten eseptelgenin atap ótý mańyzdy, bul qala halqynyń 4 aılyq tutynýynyń 30%-yn quraıdy. Osylaısha, aımaqtar kókónisterdiń qorlaryn brondaýdy bastaı alady.

«Premer-Mınıstr negizgi azyq-túlik baǵasyna qatysty jaǵdaıdy turaqtandyrý jóninde naqty tapsyrma berdi. Úkimettiń usynystary bar, eń bastysy – tártip pen oryndaý talap etilýde. Qyryqqabat boıynsha óz qorlaryn áli qamtamasyz etpegen aımaqtar úshin Qyrǵyzstanda arzan baǵamen kelisim-shart jasaýdy usynamyn, biz «Qaztrade» AQ arqyly qoldaý kórsete alamyz. Osy ýaqytta kókónis qorlaryn brondaýdy dereý bastańyzdar», — dedi saýda jáne ıntegratsııa mınıstri Serik Jumanǵarın.