Óńirlerde gaz tehnıkalyq ınspektsııalary tıisti deńgeıde jumys istemeıdi – TJM

NUR-SULTAN. QazAqparat – Óńirlerde gaz tehnıkalyq ınspektsııalary baqylaý fýnktsııalaryn tıisti deńgeıde oryndamaı otyr. Bul týraly QR Tótenshe jaǵdaılar vıtse-mınıstri Mereke Pishembaev aıtty, dep habarlaıdy QazAqparat.

«Qaıǵyly oqıǵalardyń basty sebepteriniń biri – zańnamada kózdelgen jergilikti atqarýshy organdardyń gaz tehnıkalyq ınspektsııalarynyń baqylaý fýnktsııalaryn tıisti deńgeıde oryndamaýy bolyp otyr. Búginde ákimdikter men Bas prokýratýranyń málimetine sáıkes, Nur-Sultan, Almaty, Shymkent qalalarynyń ákimdikterin qospaǵanda, jergilikti atqarýshy organdar gaz jáne gazben jabdyqtaý salasyndaǵy memlekettik baqylaýdy jetkiliksiz deńgeıde júrgizýde, Kásipkerlik kodekste kózdelgen tekserý is-sharalary josparlanbaıdy jáne júrgizilmeıdi», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, birqatar ákimdikter (Aqmola, Almaty, Atyraý, Qaraǵandy, Pavlodar, Soltústik Qazaqstan) gaz jáne gazben jabdyqtaý salasynda memlekettik baqylaý kezinde uıymdastyrýshylyq máseleler bolǵanyn, shtat jetispeýshiligin jáne qosymsha bilim berý múmkindigi men tehnıkalyq beıindik bilimi bar mamandardyń bolmaýyn atap ótken.

«Sondaı-aq, jergilikti organdarda aýdandyq ákimdikter deńgeıinde gaz jáne gazben jabdyqtaý salasynda memlekettik baqylaý júrgizetin tıisti bólimsheler qurylmaǵan», - dedi M. Pishembaev.

Buǵan deıin vıtse-mınıstr Qazaqstanda gaz ballony jarylysynan qansha adam qaza tapqanyn aıtqan edi. Sondaı-aq, halyqtyń kópshiligi gaz ballondaryn jaqyn mańdaǵy janarmaı quıý beketinen zańsyz toltyrady.