Óńirler bıýdjetten bólingen 143 mlrd. teńgeni ıgere almaı otyr - baspasózge sholý
***
«Egemen Qazaqstan» gazetiniń jazýynsha, Qazaqstan Táýelsizdigi kúnin «Kókshetaý mıneraldy sýlary» aktsıonerlik qoǵamy óndiristik órleý ústinde qarsy aldy. Mereke ústinde munda quny 600 mıllıon teńgelik jańa ınvestıtsııalyq jobany iske qosý saltanaty ótti. Endi, quıý tsehyn qýattandyrý nátıjesinde eńbek ónimdiligi úsh ese artatyn bolady. «Frankoıtalıandyq «Sidel» kompanııasynyń jetildirilgen avtomatty jelisin ornatý nátıjesinde zaýyt konveıerinen saǵatyna 14 myń shólmek sýsyn shyǵatynyn aıtqan dırektorlar keńesiniń tóraǵasy Asqar Álıev oblys basshylyǵy men ujym múshelerine alǵysyn jetkizdi. Jańa joba kóptegen áleýmettik qolaılylyqtarǵa da jol ashpaq», - dep jazady basylym. Máselen, gazettiń jazýyna qaraǵanda, 2013 jyldyń 1 qańtarynan bastap jalaqy kólemin 20 paıyzǵa kóterýge múmkindik týyp otyr. Onyń ústine, aýysym jıiligin qysqartý arqyly bes kúndik jumys kestesi qamtamasyz etilmek. Sondaı-aq, qalany nárlendirýshi kásiporyn bıýdjet salyqtarynyń aýqymyn 4,5 mıllıard teńgege jetkizýdi kózdeýde. Aqparat «Investıtsııalyq joba iske qosyldy» degen taqyryppen berildi.
Osy basylymnyń jazýynsha, Tımırıazev aýdanyna qarasty Dokýchaev eldi mekeninde mal sharýashylyǵymen aınalysatyn «Atameken Agro-Tımırıazevo» JShS «Sybaǵa» baǵdarlamasy aıasynda 260 asyl tuqymdy iri qara malyn satyp aldy. Muhıttyń arǵy jaǵynan ákelingen túlik arnaıy jabdyqtalǵan kóliktermen jetkizildi. Seriktestik dırektory Q. Sapýlatovtyń aıtýyna qaraǵanda, asyl tuqymdy maldar jergilikti jerge úıretilgenshe jyly qoralarda ustalady.
***
«Máskeýge jumys saparymen kelgen QR Prezıdenti Nursultan Nazarbaev búgin UQShU Ujymdyq qaýipsizdik keńesiniń (UQK) sessııasyna, EýrAzEQ Memleketaralyq keńesiniń jáne Joǵarǵy Eýrazııalyq ekonomıkalyq keńesiniń (JEEK) otyrystaryna qatysady. Іs-sharalar alty memleket basshylarynyń qatysýymen Máskeýdegi Úlken Kreml saraıynda ótedi», - dep jazady «Kazahstanskaıa pravda» gazeti búgingi sanyndaǵy «Nasyşennaıa povestka dnıa rabochego vızıta Glavy gosýdarstva v Moskvý» degen taqyryptaǵy maqalasynda. Basylymnyń atap ótýinshe, UQShU UQK-niń sessııasyna Qazaqstan, Armenııa, Belarýs, Qyrǵyzstan, Reseı jáne Tájikstan prezıdentteri qatysady. Memleket basshylary zamanaýı halyqaralyq ahýal men ujymdyq qaýipsizdik júıesin jetildirýge qatysty máselelerdi talqylaıdy. Jańa qaýip-qaterlermen kúresý úshin UQShU-ǵa múshe-memleketterdiń áleýetin nyǵaıtý boıynsha is-sharalardy qaraý josparlanǵan.
***
1 qarashadaǵy jaǵdaı boıynsha Qazaqstanda jergilikti bıýdjetter shamamen 143 mlrd. teńgeni ıgergen joq. Aıta keterligi, 1 qazandaǵy jaǵdaıǵa sáıkes Astana bólingen qarjyny ıgerý jaǵynan keıinge qalyp otyr. Qala bólingen qarajattyń ne-bári 89,5 paıyzyn ǵana ıgergen. Bul jaıynda «Vremıa» gazetindegi «Chınovnıkı prosıat bolshe, chem mogýt perejevat!» degen taqyryptaǵy maqalada keńinen baıandalǵan. Basylymnyń Respýblıkalyq bıýdjettiń oryndalýyn baqylaý jónindegi esep komıtetiniń burynǵy basshysy, qazirgi Májilis depýtaty Omarhan Óksikbaevtyń málimdemesine súıene otyryp jazýynsha, memleket qarjysynyń ıgerilmeýiniń basty sebebi josparlaýǵa ketetin shyǵyndar kórinedi.
Sondaı-aq osy basylymnyń «Rabota nad oshıbkamı» degen taqyryppen berilgen maqalasynda qyzylordalyqtar qala kóshelerindegi saýatsyz jarnamalarmen kúresti qolǵa alatyny jaıynda baıandalǵan. Osy maqsatta «Taza til» dep atalatyn jastar qozǵalysy da qurylǵan. Qozǵalys belsendileri alypsatarlardyń «Jarnama týraly» Zańdy buzbaýyn, qala kóshelerinde ilinetin syrtqy jarnamalarda orfografııalyq qateler jibermeýlerin qatań qadaǵalaýlaryna almaq. Egerde qate ketken mundaı bannerler nemese bılbordtar «Taza til» qozǵalysy músheleriniń nazaryna iliger bolsa, onda olar jarnama nysanynyń ıesin izdep tappaq. Al odan keıin onyń jibergen qatelikterin túzetýge bar kúsh-jigerlerin jumsamaq.