Óńirde qaýipsizdiktiń tıisti deńgeıin qamtamasyz etý kerek - Premer Qaraǵandy oblysynda

NUR-SULTAN. QazAqparat – Qaraǵandy oblysyna jumys saparymen barǵan QR Premer-Mınıstri Álıhan Smaıylov óńirde oqys oqıǵalardyń jıilep ketkenin aıtyp, tıisti tapsyrmalar júktedi, dep habarlaıdy QazAqparat Úkimettiń resmı saıtyna silteme jasap.

Premer-Mınıstr sońǵy ýaqytta Qaraǵandy oblysynda órt jáne sýdaǵy jazataıym oqıǵalarmen, sondaı-aq kásiporyndardaǵy oqıǵalarmen baılanysty tótenshe jaǵdaılar jıilep ketkenin atap ótti.

«Tótenshe jaǵdaılar mınıstrligi oblys ákimdigimen birlesip, óńirdegi qaýipsizdiktiń tıisti deńgeıin qamtamasyz etý boıynsha barlyq qajetti sharalardy qabyldasyn», - dep tapsyrdy Álıhan Smaıylov óńirdiń keshendi áleýmettik-ekonomıkalyq damýy jónindegi keńeste.

Sondaı-aq, Eńbek jáne halyqty áleýmettik qorǵaý mınıstrligine «Atameken» palatasymen jáne Kásipodaqtar federatsııasymen birlesip, aralas jaýapkershilikti qoldaný kezinde qyzmetkerdiń kinásiniń eń joǵary shegin belgileý boıynsha biryńǵaı ustanymdy ázirleý jáne jazataıym oqıǵalar jónindegi zańnamany jetildirý boıynsha tásilderdi ázirleý tapsyryldy.

Aıta ketsek, Qaraǵandy oblysyna jumys sapary kezinde QR Premer-Mınıstri Álıhan Smaıylov Temirtaý qalasynyń ónerkásip jáne áleýmettik nysandaryn aralady.

Foto: primeminister.kz