Ónimderdiń ımportyn almastyratyn jobalarǵa ekpin qoıylady - Aıdar Áriphanov

NUR-SULTAN. Qazaqparat – Ónimderdiń ımportyn almastyrý aıasyndaǵy jobalarǵa erekshe nazar aýdarylady. Bul týraly Úkimet otyrysynda agroónerkásip keshenindegi jobalardy talqylaý kezinde «Báıterek» UBH» AQ basqarma tóraǵasy Aıdar Áriphanov aıtty, dep habarlaıdy QazAqparat tilshisi.

«Holdıngtiń qarjylyq qoldaýymen jalpy quny 62 mlrd teńge bolatyn 56 joba paıdalanýǵa berildi, bul rette 1695 turaqty jáne 204 ýaqytsha jumys orny quryldy. Qant, qus eti, alma, sút jáne balyq ónimderin óndirý sııaqty baǵyttardaǵy ónimderdiń ımportyn almastyrý aıasyndaǵy jobalarǵa erekshe nazar aýdarylady. Osy jyly Holdıng 92 mlrd teńge qarjylandyrý kólemimen ımportty almastyrý boıynsha 5 ınvestıtsııalyq jobany qarjylandyrýǵa maquldady. Holdıng osy baǵytta qoldaý kólemin arttyrýdy jalǵastyrady. Enshiles kompanııalardyń qaraýynda 21 mlrd teńgege 16 joba bar», - dedi Aıdar Áriphanov.

Sonymen qatar ol agroónerkásiptik keshende júzege asyrylatyn holdıngtiń iri ınvestıtsııalyq jobalary týraly aıtty.

«Qazirgi ýaqytta, qýattylyǵy jylyna 150 myń tonna QAZSUGAR qant zaýytyn salý, óndiristik qýaty tiri salmaqta 30 myń tonna qus etin óndiretin Makınsk qus fabrıkasynyń úshinshi kezegi, sondaı-aq basqa da iri jobalar jalǵasady», - dedi basqarma tóraǵasy.

Budan buryn habarlanǵandaı, Aıdar Áriphanov agroónerkásip keshenindegi jobalardy qarjylandyrý baǵyty týraly baıandady.