Ónim az bolýy múmkin: dándi daqyl egilgen alqaptardyń 40%-y nashar kúıde

ASTANA. QazAqparat – Qazaqstanda dándi daqyldar egilgen alqaptardyń 40%-ǵa jýyǵy nashar kúıde, dep habarlaıdy QazAqparat tilshisi.

«Ósimdik sharýashylyǵy monıtorıngi bóliminiń mamandary egis daqyldarynyń jaı-kúıine spýtnıktik baǵalaý júrgizdi. 10 shildedegi jaǵdaı boıynsha Qazaqstanda aýyl sharýashylyǵy dándi daqyldary egilgen alqaptary aýdanynyń jaı-kúıi Jerdi qashyqtyqtan zondtaý derekteri boıynsha baǵalanýy: óte jaqsy – 1 059 681,15 gektar (jalpy alqaptyń 6,4%-y), jaqsy – 2 052 346 gektar (jalpy alqaptyń 12,4%-y), qanaǵattanarlyq – 6 910 060,5 gektar (jalpy alqaptyń 41,9%-y), nashar – 4 333 005,2 gektar (jalpy alqaptyń 26,3%-y), óte nashar – 2 129 328,2 ga (jalpy alqaptyń 13%-y)», - delingen «Qazaqstan Ǵarysh Saparynyń» zertteý derekterinde.

Ulttyq kompanııa málimetine saı, jaı-kúıi «nashar» jáne «óte nashar» dep baǵalanǵan alqaptardan alynatyn ónim kólemi az bolýy múmkin.

«Ósimdik sharýashylyǵynyń ǵaryshtyq monıtorınginiń nátıjeleri boıynsha aqparat Aýyl sharýashylyǵy mınıstrliginiń Ósimdik sharýashylyǵy ónimderin óndirý jáne qaıta óńdeý departamentine beriledi. Jalpy, Jerdi qashyqtyqtan zondtaý derekteri boıynsha jaı-kúıi «nashar» jáne «óte nashar» dep baǵalanatyn daqyldar anyqtalǵan jaǵdaıda ónimdiliktiń tómendeýine nemese onyń tolyq bolmaýyna ákelýi múmkin», - dep jazylǵan «Qazaqstan Ǵarysh Saparynyń» habarlamasynda.