Ónerkásip mınıstrligi: 9 aıda elde 5 myńnan astam traktor men kombaın qurastyrylǵan

<p>ASTANA. KAZINFORM &ndash; Keıingi 5 jylda eldegi aýyl sharýashylyǵy tehnıkasynyń óndiris kólemi 4 ese ósken. Úkimet otyrysynda Ónerkásip jáne qurylys mınıstri Qanat Sharlapaev osyndaı málimet aıtty.</p>

«Aýyl sharýashylyǵy mashınalary sektorynda sońǵy 5 jylda óndiris kólemi 4 esege ósti. 

9 aıdyń qorytyndysy boıynsha 5 myńnan astam traktor men kombaın óndirildi.

Aýyl sharýashylyǵy kásiporyndary otandyq tehnıkamen, onyń ishinde álemdik CLAAS, Horsch, Deutz Fahr brendteriniń Qazaqstanda óndirilgen zamanaýı tehnıkasymen qamtamasyz etilgen. Bıyl álemdik naryqtyń kóshbasshylary Amazone jáne Zoomlion kompanııalary elge tartyldy», - dedi mınıstr.

Qanat Sharlapaevtyń aqparatyna súıensek, elde traktor kabınalary men kombaın býnkerleri sııaqty iri bólshekterdiń óndirisi iske qosylǵan. 

«Óndirýshiler men qosalqy óndirister arasynda kooperatsııa jolǵa qoıyldy. Qostanaı qalasynda lokalızatsııa ortalyǵy qurylyp, onda komponenttik bazany óndirý tsehteri uıymdastyryldy. Aspaly jáne tirkemeli tehnıka óndirisin ulǵaıtý boıynsha jumystar júrgizilip jatyr», - dedi vedomstvo basshysy.