Ónerkásip alpaýyttaryna ekologııalyq aýdıt júrgizýdiń tártibi jarııalandy
Zańnamaǵa orman sharýashylyǵy men erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizýdi kózdeıtin zań jobasyn Ekologııa, tabıǵı resýrstar mınıstrligi jarııalap otyr.
Qujat 26 qańtarǵa deıin kópshilik talqylaýynda bolady.
«Lıtsenzııalaýǵa jatatyn I-sanattaǵy obektilerdiń operatorlary emıssııalardyń belgilengen normatıvterinen bir jyl ishinde júıeli (eki retten artyq) asyp ketken kezde mindetti ekologııalyq aýdıt júrgizýge mindetti», - delingen Ekologııa kodeksine usynylyp otyrǵan 175-baptyń 1-bóliginde.
Bul jerdegi lıtsenzııalaýǵa jatatyn I-sanattaǵy obektiler - joǵary deńgeıli qaýipke baılanysty qyzmet túrlerimen baılanysty nysandar.
Sondaı-aq, osy bapta ekologııalyq aýdıt ekologııalyq aýdıtor men aýdıtteletin sýbekt arasynda jasalǵan shart negizinde qorshaǵan ortany qorǵaý salasyndaǵy ýákiletti organ bergen buzýshylyqtardy joıý týraly nusqama alynǵan kúnnen bastap alty aı ishinde júrgiziletini aıtylǵan.
«Ekologııalyq aýdıtorlyq esep qorshaǵan ortany qorǵaý salasyndaǵy ýákiletti organǵa usynylady. Ol ony alǵan kúnnen bastap otyz jumys kúni ishinde qaraıdy. Mindetti ekologııalyq aýdıttiń nátıjelerin qorshaǵan ortany qorǵaý salasyndaǵy ýákiletti organ aýdıtteletin sýbektiniń ekologııalyq talaptardy saqtaýy týraly anyq aqparat alý úshin paıdalanady», - dep jazylǵan jańa bapta.
Mindetti ekologııalyq aýdıttiń esebin qaraý qorytyndysy boıynsha qorshaǵan ortany qorǵaý salasyndaǵy ýákiletti organ:
1) aýdıtteletin óndiristik ýchaskeniń qyzmetin toqtata turý nemese oǵan tyıym salý týraly talap-aryzben sotqa júginýge;
2) ekologııalyq ruqsat sharttaryna ózgerister engizip, ózge de ruqsat berý qujattamalarynyń talaptaryn ózgertý týraly usynyspen arnaıy ýákiletti memlekettik organdarǵa júginýge quqyly.