Ónerkásiptik saıasat jónindegi vedomstvoaralyq komıssııa qurylmaq

NUR-SULTAN. QazAqparat – Ónerkásiptik saıasat jónindegi vedomstvoaralyq komıssııa (VAK) qurylmaq. Bul týraly Májiliste «Ónerkásiptik saıasat týraly» zań jobasyn tanystyrý kezinde QR Indýstrııa jáne ınfraqurylymdyq damý vıtse-mınıstri Amanııaz Erjanov málim etti, dep habarlaıdy QazAqparat tilshisi.

Onyń aıtýynsha, zań jobasynda «Ónerkásipti damytýdyń bazalyq sharttary» atty ekinshi bólim ónerkásiptik saıasatty iske asyrý úshin ınstıtýtsıonaldyq negizdi jáne memlekettik yntalandyrý sharalaryn retteıdi. Instıtýtsıonaldyq jaǵdaılar birinshi kezekte ónerkásiptik saıasatty qalyptastyrý men iske asyrýdy vedomstvoaralyq tıimdi úılestirýdi qamtamasyz etýge negizdeledi.

«Búginde ónerkásipke baılanysty fýnktsııalar túrli vedomstvolar boıynsha bólingen. Ónerkásiptik saıasatty tıisti úılestirýdi qamtamasyz etý úshin negizgi zań jobasynda Ónerkásiptik saıasat jónindegi vedomstvoaralyq komıssııa (VAK) qurý kózdeledi. Ony Premer-Mınıstrdiń orynbasary basqarady. Al onyń músheleri memlekettik organdar basshylarynyń orynbasarlary, ónerkásiptik kásiporyndardyń ókilderi, qoǵam qaıratkerleri, depýtattar jáne basqa da múddeli tulǵalar bolady», - dedi vıtse-mınıstr.

VAK-qa kelesi quzyret beriledi:

- Úkimetke yntalandyrýdyń jańa sharalaryn engizý, qazirgilerin qaıta qaraý jáne kúshin joıý týraly usynymdar berý;

- Ónerkásiptik saıasat máseleleri boıynsha Úkimettiń, onyń ishinde kelissózder júrgizýdiń halyqaralyq uıymdardaǵy ustanymyn daıyndaý;

- Ónerkásiptik saıasat máseleleri boıynsha memlekettik organdar arasyndaǵy kelispeýshilikter boıynsha sheshimder qabyldaý;

- Ónerkásiptik saıasatty iske asyrý týraly esep tyńdaý jáne basqalar.