«Ónerkásiptik saıasat týraly» zań tujyrymdasy bıyl qabyldanady

NUR-SULTAN. QazAqparat – «Ónerkásiptik saıasat týraly» zań tujyrymdasy jyl sońyna deıin qabyldanady. Bul týraly Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Búgingi tańda «Ónerkásiptik saıasat týraly» zań tujyrymdamasynyń jobasy ázirlenýde. Jobany salalyq qaýymdastyqtar, ónerkásiptik kásiporyndar jáne múddeli memlekettik organdar talqylap jatyr. Zań jobasynda qoldaý sharalaryn keńeıtý, memlekettik, kvazımemlekettik sektorlar men jer qoınaýyn paıdalanýshylar tarapynan kepildi satyp alýdy júzege asyrý sharalary kózdelgen. Tujyrymdama jyl sońyna deıin qabyldanady», - dedi ol.

Mınıstrdiń atap ótýinshe, vedomstvo retteletin satyp alýdaǵy jergilikti qamtýdy damytýǵa jáne memlekettik organdar, ulttyq kompanııalar men holdıngterdiń birinshi basshylary men orynbasarlarynyń jaýapkershiligin kúsheıtýge baǵyttalǵan normatıvtik quqyqtyq aktilerge ózgerister toptamasyn ázirleıdi.

«Otandyq shıkizatty qaıta óńdeýdi tereńdetý jumysy ári qaraı júrgiziledi. Áleýet 35 mlrd AQSh dollarynan asady. Metallýrgııa ónerkásibinde otandyq shıkizat negizinde joǵary bólinisti ónimder óndirisin damytýǵa basa nazar aýdarylady. Otandyq kásiporyndardy tıimdi baǵalarmen qajetti kólemde qamtamasyz etý tetigin ázirleı otyryp, shıkizatqa jyl saıynǵy qajettilikti qalyptastyrý josparlanyp otyr», - dedi Beıbit Atamqulov.