Ónerkásiptik saıasat aıasynda bıznesti yntalandyrýdyń qadamdary qoljetimdi bolady
«Zań jobasynyń basty jańalyǵy - memlekettik yntalandyrý jańa sharalaryn jáne ınfraqurylymnyń elementterin bekitý boıynsha Úkimettiń quzyretin engizý. Bul memlekettik apparatqa ıkemdilik pen jyldamdyqty beredi jáne bıznes úshin qajetti mańyzdy sheshimderdi ýaqytyly qabyldaýdy qamtamasyz etedi. Memlekettik yntalandyrý óńdeýshi ónerkásiptiń tıimdi kásiporyndaryna baǵyttalatyn bolady. Bul úshin Basym taýarlar tizbesin qalyptastyrý jáne bekitý boıynsha ýákiletti organnyń quzyreti kózdelgen (Indýstrııa jáne ınfraqurylymdyq damý mınıstrligi)», - dedi B. Atamqulov.
Onyń aıtýynsha, búgingi tańda qosylǵan quny joǵary 4 myńnan astam taýar iriktelindi. Ónerkásipti memlekettik yntalandyrý is-sharalary tizbedegi taýarlardy óndirýshilerge ǵana kórsetilmek. Kórsetiletin memlekettik yntalandyrý is-sharalarynyń tıimdiligin qamtamasyz etý úshin óndiris kórsetkishterin arttyrý jónindegi talaptardy kózdeıtin qarsy mindettemeler engiziledi.
«Biz osy mindettemelerdiń oryndalýyna monıtorıng júrgizemiz jáne kásiporyn olardy oryndamaǵan jaǵdaıda erejege sáıkes bıýdjet qarajatyn qaıtarýy tıis. Budan basqa, básekege qabilettilikti arttyrý týraly kelisim jasaý arqyly kásiporyndarǵa yntalandyrý is-sharalarynyń keshendi túrin alý múmkindigi kózdelgen. Kelisim kásiporyndarǵa óndiristik qyzmetti orta jáne uzaq merzimdi kezeńderge josparlaýǵa múmkindik beredi. Memlekettik yntalandyrý is-sharalarynyń barlyq tizimi zań jobasyn ázirleý barysynda da qaıta qaraldy. Ónimdi tehnologııalyq jańǵyrtýǵa jáne ilgeriletýge baǵyttalǵan jańa qadamdar engizildi. Jalpy alǵanda, bıznes úshin yntalandyrýdyń 20-ǵa jýyq is-sharalary qoljetimdi bolady. Kásiporyndardyń suraýy boıynsha yntalandyrýdyń jańa ádisi – ónerkásiptik grant ázirlendi. Ónerkásiptik grant birlesip qarjylandyrý jolymen óndiristi jańǵyrtýǵa beriletin bolady», - dedi mınıstr.
Jańa qadam kásiporyndardy tehnologııalyq qaıta jaraqtandyrýdy qamtamasyz etedi jáne shyǵarylatyn ónimniń sapasyn arttyrady.