Ónerkásiptik alyptar jergilikti qamtýdy arttyratyn bolady - Qaraǵandy oblysy

QARAǴANDY. QazAqparat - Qaraǵandy oblysynda júıe quraýshy kompanııalardyń satyp alýlaryndaǵy jergilikti qamtý ulǵaıtylady. Bul másele turaqty baqylaýda. Bıliktiń «Aımaqta jumys jasańyzdar - jergilikti taýarlardy satyp alyńyzdar» degen ustanymy ózgerissiz qalady, dep habarlaıdy QazAqparat óńir ákimdiginiń resmı saıtyna silteme jasap.

Oblys ákimi Jeńis Qasymbek ónerkásipshiler men «ArselorMıttal Temirtaý» basshylyǵynyń qatysýymen onlaın-keńes ótkizdi. Kezdesýde 2020 jyly jergilikti qamtýdy damytý nátıjeleri men osy jylǵa arnalǵan josparlar talqylandy.

- Jergilikti qamtýdy arttyrý úshin oblys ákimdigi men «ArselorMıttal Temirtaý» arasynda 2020 jylǵa arnalǵan ózara yntymaqtastyq týraly Memorandýmǵa qol qoıyldy. Qujatqa óńirdiń 49 taýar óndirýshisi engizildi. Shıkizattyq emes taýarlardyń kólemin arttyrýǵa basa nazar aýdaryldy. Jyl qorytyndysy boıynsha mundaı satyp alýlar kólemi 31,2 mlrd teńgeni qurady - 2019 jylmen salystyrǵanda 6 ese kóp, - dedi Ónerkásip jáne ındýstrııalyq-ınnovatsııalyq damý basqarmasynyń basshysy Ǵalymjan Jumasultanov.

Onyń aıtýynsha, kompanııa 34 jergilikti kásiporynmen kelisimshart jasasqan. Bul 2019 jylmen salystyrǵanda eki ese kóp.

Ǵalymjan Jumasultanov 2021 jylǵa arnalǵan Memorandýmǵa qol qoıýǵa daıyndalyp jatqanyn habarlady. Kompanııa jergilikti taýarlardy satyp alýdy arttyrady dep kútilýde.

Kompanııanyń aldaǵy josparlarymen «ArselorMıttal Temirtaý» AQ atqarýshy dırektory Vadım Basın tanystyrdy. Ol kompanııa shıkizattyq emes sektordy odan ári qoldaýǵa daıyn ekenin málimdedi.

- Bul biz úshin de tıimdi - jetkizilim merzimin, ónim sapasyn qysqartýǵa qatysty. Biz Qaraǵandy oblysynda jáne «Saryarqa» AEA alańynda jumys isteıtin kásiporyndarmen tyǵyz yntymaqtasýǵa daıynbyz, - dep sendirdi Vadım Basın.

Kezdesýge qatysýshylar baǵa belgileýge, satyp alýdy ótkizýdiń ashyqtyǵyna, tutynýshylarǵa metall jetkizýge qatysty máselelerdi de talqylady.

Metallýrgııada suranysqa ıe bolýy múmkin ónim óndirý boıynsha birqatar jobalar tanystyryldy.

- Bıylǵy jyly biz ózimizge jergilikti qamtýdy kem degende eki ese ulǵaıtý mindetin qoıyp otyrmyz. Bizde damý úshin barlyq jaǵdaı bar, áleýet zor. Jergilikti taýar óndirýshilerdi tartý maqsatynda satyp alýdy ótkizýdiń barynsha ashyqtyǵyn qamtamasyz etý qajet. Biz júıe quraýshy kompanııalardyń shaǵyn jáne orta bıznesti qoldaýyn talap etemiz. Biz úshin eń bastysy - jumys oryndaryn saqtaý, - dep atap ótti Jeńis Qasymbek.