Ónerkásiptegi qaýipsizdik talaptary boıynsha zańǵa túzetýler engiziledi - Smaıylov

ASTANA. QazAqparat - Qazaqstanda ónerkásiptegi qaýipsizdik talaptary qaıta qaralady. Bul týraly Senattyń jalpy otyrysynan keıingi baspasóz máslıhatynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«ArselorMıttalǵa qatysty aıtatyn bolsaq, osy kompanııa ıeleriniń áreketteri men áreketsizdigine quqyqtyq baǵa beriledi», - dedi Álıhan Smaıylov tilshilerdiń suraqtaryna jaýap bere otyryp.

Premer-Mınıstr Úkimet mundaı óndiris oryndarynda ónerkásip qaýipsizdigin qamtamasyz etý boıynsha júıeli sharalar qabyldaýy kerektigin aıtty.

«Ásirese, qaýipti óndiristerge qatysty jumystar júrgiziledi. Sondyqtan biz qazir zańnamada tıisti jumystardy jetildirý úshin qosymsha normalar daıyndap jatyrmyz. Osyndaı óndiristik qaýipti óndiristerdiń ıeleri men basshylarynyń jaýapkershiligi artady. Ekinshi jaǵynan, memlekettiń baqylaý jumystary kúsheıtiledi. Tehnıkalyq qaıta jaraqtandyrýdy jańǵyrtýdy qarjylandyrý deńgeıin mundaı kompanııalardyń jyldyq jıyntyq tabysynyń keminde 1 paıyzy deńgeıinde zańnamalyq turǵydan bekitý usynylyp otyr», - dedi Álıhan Smaıylov.

Onyń aıtýynsha, ónerkásiptegi qaýipsizdikke qoıylatyn barlyq talaptar jańa tehnologııalardy eskere otyryp qaıta qaralatyn bolady.

«Osy oraıda tıisti zańnamaǵa ózgerister men tolyqtyrýlar engizý josparlanyp otyr», - dedi Úkimet basshysy.

Bul turǵyda zańnamaǵa túzetýler bıyl Parlament qaraýyna tússe, kelesi jyly qabyldanatyny aıtyldy.