Ónerkásipke qajetti ınnovatsııalar JOO zerthanalarynda júzege asyrylýda -Joldaý

ASTANA.QazAqparat - Elbasynyń bıylǵy «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýy elimizdiń aldyna ekonomıkalyq jáne áleýmettik salalardy damytýǵa baǵyttalǵan jańa mindetter qoıyp otyr. Sonyń ishinde ındýstrııanyń, ǵylym men tehnıkanyń damýyna negizdelgen jańa zamanaýı tehnologııalardy keńinen engizýge baǵyttalǵan mindetter jas ǵalymdardyń atsalysa sheshetin máseleleri. 

Memleket basshysynyń Joldaýyna qatysty pikir bildirgen S.Amanjolov atyndaǵy Shyǵys Qazaqstan memlekettik ýnıversıteti janyndaǵy Ulttyq ǵylymı zerthana meńgerýshisi, PhD doktory Baýyrjan Rahadılov osylaı dedi, dep habarlaıdy QazAqparat.

Zerthana meńgerýshisiniń aıtýynsha, Elbasynyń Joldaýynda kóterilgen máselelerdi júzege asyrýda ǵylymı ortalyqtardyń, ınstıtýttardyń jáne joǵary oqý oryndarynyń alatyn orny erekshe.

«Jalpy álemde ǵylym men ınnovatsııadaǵy jetistikterdiń kópshiligi joǵary oqý oryndary janyndaǵy zerthanalar men ǵylymı ınstıtýttardan shyǵyp jatqany belgili. Bıylǵy Joldaý bizdiń ýnıversıtet janyndaǵy Ulttyq ǵylymı zerthana jumysynyń maqsattaryn aıqyndap bergendeı. Qazirgi tańda zerthanada qyzmet etý sapasy óte joǵary óndiristik sharalardy júzege asyrý, kompozıttik polımerlik materıaldardy alý jáne aýyl sharýashylyǵynda keńinen qoldaný, ónimdiligi joǵary kartop alýdyń bıotehnologııalyq ádisterin jasaý sııaqty birqatar jobalar júzege asyrylyp jatyr. Sonymen qatar, zerthana bazasynda Elbasy Joldaýynyń baǵyttaryna sáıkes keletin «Turǵyn úı-kommýnaldyq sharýashylyǵynyń qajettiligine arnalǵan energııa únemdeıtin avtomattandyrylǵan jaryqtandyrý keshenin ázirleý», «Mashına jasaý buıymdaryna arnalǵan qajalýǵa tózimdi materıaldar alýdyń ınnovatsııalyq tehnologııalaryn ázirleý» jáne «Sýda erıtin polımerler negizinde ósimdikterdiń tuqymyn qaptaýǵa arnalǵan polımerlik kompozıtter alý» sııaqty jobalar da qolǵa alynǵan»,- deıdi Baýyrjan Rahadılov.

Onyń aıtýynsha, osy sekildi jobalardy júzege asyra otyryp, Ulttyq ǵylymı zerthana ǵalymdary Elbasy Joldaýyndaǵy mindetterdi iske asyrýǵa nıetti.

«Bul rette jas ǵalymdardy Joldaýda qoıylǵan mindetterdi júzege asyrýǵa, elimizdiń tórtinshi óndiristik tóńkeris jaǵdaıynda básekege qabiletti elge aınalýyna jáne álemdegi otyz damyǵan memlekettiń qataryna kirýine úles qosýǵa shaqyramyn. Sebebi, eldegi ǵylymnyń, óndiristiń jáne jańa tehnologııalardyń damýy qazirgi jastardyń bilimi men biliktiligine tikeleı baılanysty. Al ǵylym men tehnıkanyń damýy - bul eldiń basege qabilettiliginiń kepili» deıdi ol.