Ónerimen talaıdy tańqaldyrǵan jarmyshtyq sheber bar bilgenin balalarǵa úıretip júr

AQTAÝ. QazAqparat - Mańǵystaý oblysynyń Jarmysh aýylynda turatyn Sáttiǵalı Shádibaev - sýretshi ári aǵash sheberi. Ol jastaıynan aǵashtan ulttyq naqyshtaǵy túrli buıymdardy jasaýmen aınalysady, dep habarlaıdy QazAqparat tilshisi.

Mańǵystaý ólkesinde týyp-ósken ol ónerimen talaıdy tańqaldyryp júr.

Ustanyń sheberhanasy - óz úıi. Shyǵarmashyl jannyń qolynan shyqqan týyndylar bólmesine kirgende birden kózge túsedi.

«Qolymyzdan kelgen, ıdeıamyzdan týyndaǵan dúnıelerdi daıyndap jatyrmyn. Máselen, balalarǵa arnalǵan aǵash besik, dombyra, urshyq, qazaqtyń bes qarýy da osy sheberhanadan tabylady. Jalpy aǵashtan túıin túıip, sýret salýdy bozbala kezimnen bastadym. Sheberlik qabilet áke-sheshemnen daryǵanymen, bala armanym sýretshi bolýǵa jeteledi. Kásibı bilim alyp, shákirtterime úıretip júrmin»,-deıdi Sáttiǵalı Shádibaev.

Jarmyshtyq sheber - mektepte muǵalim. Ol oqýshylarǵa syzý, beıneleý jáne tehnologııa páninen sabaq beredi.

Ustaǵa alys-jaqyn oblystardan da tapsyrys berýshiler óte kóp.

Birneshe ónerdi birdeı meńgergen Sáttiǵalı Shádibaev - keremet qylqalam sheberi. Ol kóptegen ataqty tulǵalardyń portretin salǵan.

Máselen, memleket jáne qoǵam qaıratkeri, Qazaqstannyń halyq jazýshysy Ábish Kekilbaevtyń keskinin qaǵazǵa túsirgen.

Sheberdiń týyndylary birneshe kórme, baıqaýlarǵa qatysyp, júldeger atanǵan.