«Ónegeli ómirdiń kórkem kestesi» - baspasózge sholý
***
«Qaı zamanda da, qaı qoǵamda da tarıhı tulǵalardyń ýaqyt bederindegi izi kóp rette kórkem týyndynyń keıipkeri kúıinde kestelenip qalatyny anyq. Arǵy-bergidegi dańqty ata-babalarymyzdy bárinen buryn tarıhı dastandardyń arqaýyna aınalýy arqyly tanıtyn, qadir-qasıetin soǵan qarap ta baǵalaıtyn bizder, qazaqtar, muny tipti jaqsy bilemiz» - Prezıdent Nursultan Nazarbaevtyń ómirine arnalǵan «Elbasy joly» kınoepopeıasynyń «Otty ózen» jáne «Temir taý» fılmderiniń Astanadaǵy tusaýkeser kórsetiliminen keıin jazylǵan «Egemen Qazaqstan» gazeti maqalasynda osylaı delingen edi. Mine, endi sol lenta búkil el kóleminde tanystyrylatyn kún de kelip jetti. Keshe, 12 jeltoqsanda Astanada, Almatyda, barlyq oblys ortalyqtarynda fılmniń jalpyulttyq tusaýkeseri ótkizildi. Oǵan shyǵarmashylyq zııaly qaýym men mádenı jurtshylyqtyń, depýtattyq korpýstyń, qoǵamdyq ınstıtýttar men saıası partııalardyń, ardagerler men jastardyń, óndiris oryndary jetekshileri men jumysshylarynyń, áleýmettik sala uıymdarynyń, sondaı-aq kórermen qaýymnyń ókilderi qatysty. Búgin «Egemen Qazaqstan» gazetiniń kezekti sanynda Elbasymyz týraly kórkem týyndydan el halqynyń alǵan áserleri, zııaly qaýym tolǵanystary «Ónegeli ómirdiń kórkem kestesi» degen taqyryppen berilip otyr.
«Keshe Prezıdent janyndaǵy Ortalyq kommýnıkatsııalar qyzmetiniń uıymdastyrýymen Sochı qalasynda 2014 jyly ótkiziletin XXII qysqy Olımpııa oıyndaryna daıyndyq barysy týraly baspasóz máslıhaty ótkizildi»,- dep jazady «Egemen Qazaqstan» gazeti. Basylymnyń jazýynsha, Sport jáne dene shynyqtyrý isteri agenttiginiń tóraǵasy Tastanbek Esentaev Sochıdegi Olımpıadaǵa álemniń 80 elinen 5 myńnan astam sportshy men ár salanyń ókilderi qatysatynyn málimdedi. «Lıtsenzııalyq kezeńniń aıaqtalýyna deıin 10 sport túrinen 40 lıtsenzııa alýdy josparlap otyrmyz. Elimizdiń olımpıadalyq komandasy quramyn jasaqtaý isi kelesi jyldyń qańtar aıyna deıin jalǵasady. Onda sportshylarymyzdyń dene daıyndyǵy men psıhologııalyq jaǵdaıy, sondaı-aq irikteý kezeńderiniń jáne dopıngke qarsy baqylaýdyń qorytyndylary eskeriletin bolady. Jalpy, biz jalpy komandalyq esepte 20-23-shi orynǵa shyǵýdy maqsat tutyp otyrmyz», - dedi kelesi kezekte T.Esentaev. Maqala «Sochıge baratyn sańlaqtar aldaǵy jyldyń basynda belgili bolady» degen taqyryppen berilgen.
***
Mınıstrler kabınetiniń músheleri keshegi otyrystarynda «2014 - 2016 jyldarǵa arnalǵan respýblıkalyq bıýdjet týraly» zańyn iske asyrý týraly» Úkimet qaýlysyna biraýyzdan daýys berdi. Osy otyrys arqaý bolǵan «Aıqyn» gazetindegi maqalada Elbasy jaqynda qol qoıǵan aldaǵy 3 jyldyń respýblıkalyq bıýdjetin el Úkimeti atqarýǵa qabyldap alǵandyǵy baıandalǵan. Mınıstrler kabınetiniń músheleri keshegi otyrystarynda «2014 - 2016 jyldarǵa arnalǵan respýblıkalyq bıýdjet týraly» zańyn iske asyrý týraly» Úkimet qaýlysyna biraýyzdan daýys berdi. Endi osy basty qarjylyq qujatty iske asyrýǵa baǵyttalǵan qyzý jumys bastalyp ketýge tıis. Bul jumys qarqynynyń baıaýlaýyna jol bermeý úshin «Jańa jyl» qarsańynda el Úkimeti qaıta bas qosatyn boldy. ıAǵnı, sheneýnikterge merekeler qarsańynda arqany keńge salýǵa tyıym salyndy. Maqala «Arqany keńge salýǵa bolmaıdy» degen taqyryppen berilgen.
Osy basylymda jazýshy-dramatýrg, memlekettik syılyqtyń ıegeri Dýlat Isabekovpen aradaǵy suhbat «Senip júrgenderdiń syrt aınalatyn kezi bolady...» degen taqyryppen berilgen. Basylym tilshisiniń barlyq saýalyna tuşymdy jaýap bergen qalamger: «Ómirimde qıyndaý kezeńder boldy. Biri - shyǵarmalaryma qatty shúıligip, qara boıaýdy kóbirek izdep, túrtpektegen kez. Tragedııany kóbirek jazdym. «Tirshilik», «Dermene», «Súıekshi» povesterimnen keıin «Isabekov keńes shyndyǵyn kórmeıdi, ómirdiń tek kóleńkeli jaǵyn ǵana jazady jáne keńes ádebıetinde birinshi ret marıhýanany jyrlady» dedi. Osy áńgimeni bildeı bir aǵamyz aıtty. Ol kisi áli bar. Kitaptarym úsh-tórt jyl Qazaqstanda shyqpaı qaldy. Ondaıda tipti qasyńda júrgen adamdardyń ózi ózgerip qalady eken. Biraq Máskeý bir qolymen jazalap, bir qolymen mańdaıdan sıpaýshy edi ǵoı. Jaǵdaıdy bilgen soń «Shyǵarmalaryńyzdyń bárin jedel aýdaryp, ákelip berińiz» dep tapsyrdy. Shyǵarma olarǵa keremet unady. 1979 jyly «Otchıı dom» degen kitabymdy 30 baspa tabaqpen shyǵaryp berdi. «Lıteratýrnaıa gazeta» «Tsena dobraty ılı o novyh povestıah molodogo kazahskogo pısatelıa Dýlata Isabekova» degen úlken maqala basty», - deıdi.