Óndiristik nysandarda 15 apat bolyp, 9 adam qaza tapqan

<p>QR Tótenshe jaǵdaılar mınıstrligi seısmıkalyq jáne tehnogendi tótenshe jaǵdaılardyń aldyn alýǵa erekshe nazar aýdarýda. Bul týraly mınıstr Syrym Sháriphanov aıtyp berdi, dep habarlaıdy Kazinform.</p>

Mınıstrdiń aıtýynsha, sońǵy úsh jylda respýblıka boıynsha 65 turǵyn úı, 121 mektep, 90 densaýlyq saqtaý nysany, 40 mektepke deıingi mekeme jáne 33 qoǵamdyq-óndiristik ǵımarat seısmıkalyq turǵyda kúsheıtildi.

«2020 jyldan bastap Almaty qalasynda qatty jer silkinisi týraly halyqty erte habardar etýdiń avtomattandyrylǵan júıesin engizý boıynsha kezeń-kezeńmen jumys júrgizilýde. Ótken jyly júıeniń birinshi kezeńinde 11 stantsııa ornatý jumystary aıaqtaldy. Bıyl jyl sońyna deıin taǵy 17 stantsııanyń qurylysyn aıaqtaý josparlanýda», - dedi S. Sháriphanov Ortalyq kommýnıkatsııalar qyzmetinde ótken baspasóz máslıhatynda.

Sondaı-aq, keń aýqymdy keshendi sharalardy iske asyrý úshin seısmologııa salasynda keshendi jospar ázirleýge bastama jasalǵan, ony Memleket basshysy qoldady. Bul seısmıkalyq qaýipsizdikti qamtamasyz etý, kórsetilgen salalarǵa tsıfrlyq tehnologııalardy engizý, ǵylymı-zertteý ortalyǵymen avarııalyq-qutqarý quralymdarynyń materıaldyq-tehnıkalyq bazasyn nyǵaıtý jónindegi is-sharalardy kezeń-kezeńimen iske asyrýǵa múmkindik beredi.

Sonymen birge, tehnogendik tótenshe jaǵdaılardyń aldyn alý da mańyzdy baǵyt bolyp otyr. Qazaqstanda, ónerkásiptiń joǵary qarqynynyń damýymen eldiń jekelegen óńirlerinde apattar qaýpi joǵary deńgeıde qalyp otyr.

«Bıyl qaýipti óndiristik nysandarda 15 apat tirkeldi, 27 adam zardap shekti, 9 adam qaza tapty. Negizgi sebepter – ónerkásiptik qaýipsizdiktiń buzylýy, paıdalanylatyn jabdyqtyń tozýy, óndiristik jáne eńbek tártibiniń tómendigi», - dedi TJ mınıstri.

Aıta keteıik, búgin azamattyq qorǵaý organdarynyń qurylǵanyna 28 jyl toldy. Elimizde 27 myńnan astam qutqarýshy jumys istep júr.