Óndirýshiler men ımporttaýshylar aıaq kıimdi tańbalaýǵa qalaı daıyndalýy kerek
«Ol úshin óndirýshiler, ımporttaýshylar jáne bólshek satýshy zańdy tulǵanyń nemese jeke kásipker ETsQ-ny paıdalanyp, tańbalaý júıesine tirkelýi qajet. Bul rette elektrondy poshtasynyń mekenjaıy men telefon nómiri kórsetilip, qalǵan barlyq derekter ETsQ-men jasalady. Myna silteme boıynsha tirkelý kerek», - delingen QR Indýstrııa mınıstrligi málimetinde.
Óndirýshi jáne ımporttaýshyda GTIN (qaptamanyń shtrıh kody) bar bolsa, júıede jumysty bastaı alady.
«Taýarlardyń ulttyq katalogy» bólimine kirip, «Sýbakkaýnt» bólimindegi profıl ólshemderinegi óndirýshi týraly derekterdi toltyrady jáne taýardy «Tutynýshylyq qaptama» bóliminde tirkeı alady. Al eger GTIN bolmasa, olar GS1 Kazakhstan qaýymdastyǵyna kirýi kerek. Muny júıeniń ózinde «GS1-men ózara árekettesý» qosymshasynda jasaýǵa bolady. Sodan keıin ónim týraly málimetter Ulttyq katalogta toltyrylady.
«Qazirdiń ózinde «Tapsyrystardy basqarý stantsııasy» bóliminde taýardyń ár danasyna tańbalaý kodtaryna tapsyrys berýge bolady. Olardy PDF nemese CSV formatynda túsirip, kez kelgen prınterde basyp shyǵarýǵa jáne qorapqa, aıaq kıimge nemese taýar belgisine qoldanýǵa bolady. Óndirýshiler aıaq kıimdi satýǵa shyǵarǵanǵa deıin óndiriste, ımporttaýshylar – daıyndaýshy zaýytta nemese QR keden qoımalarynda tańbalaıdy», - dep atalyp ótken habarlamada.
Esterińizge sala keteıik, 2021 jyldyń 1 qarashasynan bastap Qazaqstanda tańbalanbaǵan aıaq kıim óndirýge jáne ımporttaýǵa tyıym salynady. Ondaı aıaq kıim qaldyqtaryn 2022 jyldyń 1 sáýirine deıin satýǵa bolady, sodan keıin sórelerde tek tsıfrlandyrylǵan aıaq kıim bolýy tıis. Qosymsha suraqtar týyndaǵan jaǵdaıda taýarlardy tańbalaý jónindegi táýlik boıy jumys isteıtin baılanys ortalyǵyna: 8 800 080 65 65 nómirimen habarlasýǵa bolady.