Óńdeý salasyn jedel damytýǵa basa mán berýimiz qajet - Memleket basshysy
«Endi ekonomıkanyń qurylymyna qatysty reformanyń negizgi tustaryna toqtalaıyn. Qazirgi eń basty mindet – elimizdiń myqty ónerkásiptik negizin qalyptastyrý jáne ekonomıkamyz ózimizdi tolyq qamtamasyz ete alatyn jaǵdaıǵa jetý. Sondyqtan, óńdeý salasyn jedel damytýǵa basa mán berýimiz qajet. Biz el taǵdyry úshin aıryqsha máni bar birqatar jobany júzege asyrýymyz kerek. Ekonomıkany ártaraptandyrý burynǵydan da mańyzdy mindetke aınalady», - dedi Qasym-Jomart Toqaev.
Prezıdenttiń aıtýynsha, bul rette metaldy tereń óńdeý munaı-gaz jáne kómir hımııasy, aýyr mashına jasaý, ýrandy konversııalaý jáne baıytý, avtobólshekter jáne tyńaıtqyshtar shyǵarý sııaqty baǵyttarǵa aıryqsha nazar aýdarǵan jón.
«Basqasha aıtsaq, joǵary deńgeıde óńdelgen ónim shyǵaratyn klaster qurý kerek», - dedi Memleket basshysy.
Prezıdent elimizdiń týrıstik áleýetin de paıdalaný kerektigin aıtty.
«Týrızm osyndaı serpindi jobalar qatarynda bolýǵa tıis. Ókinishke qaraı, osy mańyzdy saladaǵy jumys durys atqarylmaı jatyr, elimiz basqa memlekettermen salystyrǵanda artta qalyp keledi», - dedi Qasym-Jomart Toqaev.
Osy oraıda, Prezıdent keminde 15 iri jobadan turatyn naqty tizim daıyndalýy tıis ekenin tapsyrdy.
«Osy salada buryn bolǵan qatelikterdi qaıtalaýǵa bolmaıdy. Jobalardy tıimdi qoldaý sharalaryn jáne olardy oryndaý merzimderin naqty aıqyndaý kerek. Ony iske asyrýǵa shetel ınvestorlaryn jáne elimizdiń bıznes ókilderin barynsha tartqan jón. Jumysqa ózimizdiń shıkizatty, taýarlar men kadrlardy, basqasha aıtqanda, barlyq ishki múmkindikterimizdi paıdalaný qajet. Biz jańa ónerkásip saıasaty arqyly jańasha damý úlgisine kóshýge tıispiz. Memleket iri kásiporyndarmen birlesip, óndiristiń barlyq satysy óz elimizde bolýyn qamtamasyz etýi kerek. Ol úshin óndiris salasyn retteıtin jáne yntalandyratyn túrli tásilderdi qoldaný qajet. Óńdeý ónerkásibi shıkizatty kóńilge qonymdy baǵamen jetkilikti kólemde alýy kerek», - dedi Memleket basshysy.
Prezıdenttiń paıymynsha, sonymen birge retteletin satyp alý kezindegi óz taýarlarymyzdyń úlesin arttyrý jáne ofteık júıesin tolyq iske qosý qajet.
«Elimizdegi ónim óndirýshilermen jasalatyn ofteık kelisim-sharttardyń úlesin keminde 10 paıyzǵa jetkizý kerek. Bul – jyl saıyn 2 trıllıon teńge degen sóz», - dedi Memleket basshysy.