Óńdeý ónerkásibine ınvestıtsııany 1 trln teńgeden asyrý qajet - Jeńis Qasymbek
«Elimizdegi óńdeý ónerkásibiniń ónimderi 122 elge eksporttalady. Búgingi kúni eksporttyq taýarlardyń sapasy aıtarlyqtaı jaqsardy. Shetelge shyǵarylatyn ónimderdiń úshten biri ekonomıkanyń shıkizattyq emes sektoryna tıesili. Keıbir taýarlar úshin jańa naryqtar ashyldy», - dedi mınıstr.
Jeńis Qasymbektiń aıtýynsha, Ortalyq Azııa elderine eksporttalatyn taýar 30 paıyzǵa artty. Bul elderge eksporttyń kólemi 1,5 mlrd AQSh dollaryn qurady. Qazaqstan negizgi jetkizýshilerdiń bestigine kiredi jáne osy elderge ımporttalatyn taýarlardyń 8 paıyzyn quraıdy.
«Otandyq óndirýshilerdiń farmatsevtıkalyq ónim jetkizý kórsetkishi 34 paıyzǵa ósti. Farmatsevtıkalyq preparattar men medıtsınalyq buıymdar negizgi naryqtardan bólek alǵash ret Mońǵolııa men Vetnamǵa eksporttaldy. Sondaı-aq, metallýrgııalyq jáne hımııalyq ónimdi ótkizý naryǵy keńeıýde. Ónim qazir AQSh-qa jáne Eýropa elderine jetkiziledi. «Azııa Avtonyń» jeńil avtomobılderi alǵash ret Qytaı Halyq Respýblıkasyna, al «Saryarqa Avtoprom» JShS avtomobılderi Tájikstanǵa eksporttaldy»,- dedi ol.
Onyń sózine qaraǵanda, tamaq ónerkásibi men agroónerkásip kesheniniń ónimderi shetelderde úlken suranysqa ıe. Eksporttyń jalpy kólemi 1,6 mlrd AQSh dollaryn qurady. Atap aıtqanda, et jáne qus ónimderin Aýǵanstanǵa, Birikken Arab Ámirligi men Iranǵa, ósimdik maıy men baldy Qytaıǵa eksporttaý bastaldy.
«Jyl saıyn 380 eksporttaýshy qarjylyq jáne servıstik qoldaýǵa ıe bolady. Bıyl óńdeý ónerkásibindegi qol jetkizgen ósimdi odan ári arttyrýǵa múmkindik jasaýymyz kerek. 2018 jyly óńdeý ónerkásibindegi eksporttyń qundyq kóleminiń ósimin 7 paıyzǵa, eńbek ónimdiligin 11,9 paıyzǵa, negizgi kapıtalǵa salynatyn ınvestıtsııany 1 trln teńgeden astam somaǵa ósirý qajet», - dedi Jeńis Qasymbek.