Óńdeý ónerkásibi salasynda júzege asyrylatyn ındýstrııalyq jobalardyń pýly jasaqtaldy

NUR-SULTAN. QazAqparat – Elimizdiń óńdeý ónerkásibi salasyna taldaý jasalyp, alda júzege asyrylatyn ındýstrııalyq jobalardyń pýly jasaqtaldy. Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev málim etti, dep habarlaıdy QazAqparat tilshisi.

«Memleket basshysynyń tapsyrmasyna sáıkes, óńdeý ónerkásibindegi qazirgi múmkindikter men damý perspektıvalary zerdelendi. Taldaý ishki naryqta ımportty almastyrý múmkindigi jáne eksporttyq áleýetti arttyrý perspektıvalaryn eskere otyryp júrgizildi. Sondaı-aq, shıkizat bazasy, kadr tapshylyǵy jáne ınfraqurylymnyń (gaz, elektr qýaty, logıstıka) bolýy esepke alyndy. Indýstrııa jáne ınfraqurylymdyq damý mınıstrliginiń jelisi boıynsha eldegi barlyq ımportqa taldaý jasaldy», - dedi Qaıyrbek Óskenbaev Ortalyq kommýnıkatsııalar qyzmeti alańynda ótken baspasóz máslıhatynda.

Mınıstr keltirgen statıstıka boıynsha, ımporttyń jalpy somasy - 38,4 mlrd. AQSh dollary.

«Biz barlyq óńirlik ákimdikterimen birlesip, óńdeý ónerkásibi salalarynda ınvestıtsııalyq jobalar pýlyn qalyptastyrdyq. Osylaısha, 131,2 myń jańa turaqty jumys ornyn qura otyryp, jalpy somasy 20 trln. teńge bolatyn 700-den astam ındýstrııalyq jobanyń tizbesi anyqtaldy. Jobalar 4 sanatqa bólingen. Atap aıtqanda, bıyl iske qosylatyn jobalar, iske asyrylyp jatqan, pysyqtalyp jatqan jáne perspektıvalyq jobalar», - deıdi ol.