Óńdeý ónerkásibi jobalaryn keı salyqtardan 3 jylǵa bosatý kerek – Premer-Mınıstr
Úkimet basshysynyń aıtýynsha, bıznestiń problemalyq máselelerin sheshý úshin Úkimet janynda Otandyq kásipkerler keńesi jumys isteıdi. Sonymen qatar Úkimet qabyrǵasynda «Atameken» palatasynyń qatysýymen apta saıyn kásipkerler máselesin qarastyrý jóninde keńester ótedi. Mundaı ózara is-qımyl men shaǵyn jáne orta bıznesti damytý sharalary el ekonomıkasynyń turaqtylyǵyn qamtamasyz etýge yqpal etedi.
«Salyq salýdyń servıstik modeline kóshýdi qamtamasyz etý qajet. Onda bızneske qoldaý kórsetýge kóbirek nazar aýdarylady. Ulttyq ekonomıka mınıstrligi qosylǵan qun salyǵyn qaıtarý merzimin qysqartý úshin ony ákimshilendirý tásilderin qaıta qaraýy kerek. Óńdeý ónerkásibindegi jańa jobalarǵa serpin berý úshin normalardy pysyqtaýdy jedeldetip, keıbir salyqtardan 3 jyl bosata turý qajet. Salyqtardyń sanyn 20%-ǵa, al salyq jóninde esep berý nysandaryn 30%-ǵa qysqartý kerek», - dedi Á. Smaıylov Úkimettiń búgingi otyrysynda.
Sonymen birge Smaıylov iri kásiporyndar aınalasynda otandyq kásipkerliktiń jumys isteýine jaǵdaı jasaý keregin aıtty.
«Jańa óndiristerdi lokalızatsııalaýǵa jáne olardy ashýǵa yqpal etetin ofteık-kelisimsharttardy belsendirek paıdalanǵan jón. Ofsettik sharttardy qoldaný tehnologııalar transfertine jáne qosymsha ınvestıtsııa tartýǵa yqpal etedi. Ónerkásip mınıstrligi múddeli memlekettik organdarmen birge osyndaı uzaq merzimdi sharttar jasaýǵa qoldaý kórsetý sharalaryn pysyqtaýy qajet. Eń aldymen, bıznes áleýmettik turǵydaǵy jaýapkershilikti kóterýi qajet. Eńbek ónimdiligin arttyrý, óńdeýdi tereńdetý, eksportty ulǵaıtý jumystaryn jalǵastyrý qajet. Sondyqtan Ulttyq ekonomıka mınıstrligi memlekettik qoldaý sharalaryn usyný krıterıılerin naqty anyqtap alǵany jón», - dedi Premer-Mınıstr.