Ondaı sheshimdi qabyldaýǵa daıynbyz - Erdoǵan saılaýdyń ekinshi týryn ótkizý jaıynda

ANKARA. Anadoly-QazAqparat - Túrkııada 14 mamyrda ótken prezıdent jáne parlament saılaýy demokratııa meıramyna aınaldy. Bul týraly el prezıdenti Rejep Taıyp Erdoǵan dúısenbige qaraǵan túni Ankarada Ádilet jáne damý partııasynyń (ÁDP) ortalyq keńsesi janyna jınalǵan jerlesterine arnaǵan sózinde aıtty, dep habarlaıdy QazAqparat Anadoly agenttigine silteme jasap.

Túrkııa basshysynyń aıtýynsha, daýys berýdiń aldyn ala qorytyndysy ÁDP men onyń kandıdatynyń eldegi basqa saıası kúshterden áldeqaıda ozǵanyn kórsetip otyr.

«Saılaýdaǵy kórsetkishterge qaramastan basty jeńimpaz - Túrkııa jáne onyń halqy. 14 mamyrdaǵy saılaý - elimizdiń saılaý tarıhynda halyq eń joǵary belsendilik tanytqan naýqannyń biri boldy. Búkil saıası qyzmetimizde halyqtyń qalaýyna qurmetpen qaradyq. Biz osy saılaýda da, odan keıingi barlyq saılaýda da daýys berýshilerdiń pikirine qurmetpen qaraımyz. Daýys boıynsha aıyrmashylyq - shamamen 2,6 mln. Sońǵy nátıje bul alshaqtyqty taǵy arttyrdy. Sondyqtan biz birinshi týrda (prezıdent saılaýynyń) jeńiske jetý múmkindigine áli de senemiz. Eger halyq ekinshi týrdyń paıdasyna tańdaý jasaǵan bolsa, onda biz bul sheshimdi qabyldaýǵa daıynbyz», - dedi Túrkııa basshysy.

Erdoǵan prezıdent saılaýynda onyń kandıdatýrasyn qoldaǵan 27 mln saılaýshynyń árqaısysyna rızashylyǵyn bildirdi.

«Sonymen qatar saılaýǵa kelgen 56 mln saılaýshyǵa alǵysymdy aıtamyn», - dep atap ótti saıasatker.

Prezıdent Erdoǵan Túrkııa parlamentine saılaýda quramyna ÁDP kiretin «Halyq Odaǵynyń» kópshilik daýysqa ıe ekenin atap ótti.

Aıta keteıik, dál qazirgi sátte, ıaǵnı Astana ýaqytymen 08:30-da úsh úmitker - Rejep Taıyp Erdoǵan - 49,34%, Kemal Qylyshdaroǵly - 45%, Sınan Oǵan - 5,24% daýys jınady.

Búkil bıýlletenderdiń 98,22 paıyzy sanalyp úlgerdi.

Saılaý nátıjesi jaıly tikeleı efırdi tómendegi Twitter paraqshadan tamashalaýǵa bolady.