Ońdasyn Orazalın Aqtóbe qalasyn qalaı tolyq gazdandyratynyn aıtty

NUR-SULTAN. QazAqparat - «Buqara-Oral» magıstralinen Aqtóbe qalasyna úshinshi gaz qubyry tartylady. Bul týraly búgin Ortalyq kommýnıkatsııalar qyzmetindegi baspasóz máslıhatynda Aqtóbe oblysynyń ákimi Ońdasyn Orazalın aıtty, dep habarlaıdy QazAqparat tilshisi.

«Jalpy, Aqtóbe qalasynda gaz tapshylyǵy baıqalady. Sheteldik ınvestorlar zaýyt ashýǵa, basqa da kásiporyndar salýǵa yntalanyp otyr. Biraq biz olardy elektr qýatymen, gazben jáne basqa da ınfraqurylymmen qamtamasyz etýimiz kerek. Qazirgi tańda Aqtóbeniń ózinde gaz jetispeýshiligi bar. Biz «ınvestıtsııa tartamyz, jumys oryndaryn quryp, zaýyttar ashamyz» desek, áýeli gaz máselesin sheshýimiz kerek», - dedi ol.

Onyń atap ótýinshe, osyǵan baılanysty Aqtóbe qalasyna «Buqara-Oral» magıstralinen úshinshi gaz qubyryn salý máselesi pysyqtalyp jatyr.

«Bul endi úlken joba. Keminde 40 mlrd teńgege deıin qarjyny qajet etedi. Soǵan bir jaǵynan qyzyǵýshylyq tanytyp otyrǵan ınvestorlardy tartyp, ekinshi jaǵynan Úkimet qoldaýyna ıe bolamyz dep otyrmyz. Bul qajet bolsa, bıýdjetten de qarjylandyrýǵa tolyq múmkinshilik bar degen sóz. Degenmen, bul máseleni biz 2-3 jyldyń ishinde sheshýmiz kerek. Sebebi ınvestıtsııa tartamyz desek, oǵan tolyq jaǵdaı jasaǵan jón», - dedi O.Orazalın.