Ońaltý jáne bankrottyq rásimderdi qoldaný jaǵdaılary jeńildetiledi

NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine ońaltý jáne bankrottyq rásimderin, bıýdjettik, salyq zańnamasyn jáne temirjol kóligi týraly zańnamany jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

«Zań jobasy boryshkerdiń nemese kredıtordyń ońaltýdy qoldaný týraly ótinishpen sotqa júginýge negiz retinde ýaqytsha tólem qabiletsizdigin qaraýdy usynady. ıAǵnı boryshker 4 aıdan astam mindettemelerdi oryndaı almasa, ońaltý rásimin qoldanýǵa quqyǵy bar. Bankrottyq boıynsha da osyndaı jaǵdaı. Boryshker, eger mindettemelerdiń aktıvterden turaqty túrde asyp turǵany baıqalsa sotqa júginýge quqyly.

Kredıtor somany óndirip alý týraly sot aktisi, atqarýshylyq qujat nemese boryshkerdiń qaryzdy moıyndaǵanyn rastaıtyn qujat bolǵan jaǵdaıda, sotqa júginýge quqysy bar. Osylaısha, zań jobasy ońaltý jáne bankrottyq rásimderine kirýdi jeńildetedi.

Sondaı-aq, zań jobasy jeke kásipkerlerge ońaltýǵa múmkindik beredi», - dedi QR Premer-Mınıstriniń birinshi orynbasary – Qarjy mınıstri Álıhan Smaıylov.

Ádeıi jáne jalǵan bankrottyq úshin jaýapkershilikti belgileıtin zań jobasynyń qaǵıdalaryn bólek atap ótý kerek.

Zań jobasynda «Jalǵan bankrottyq» quramyn alyp tastaý jáne «Ádeıi bankrottyq» quramyn naqtylaý usynylady.

«Munda kredıtorlar aldyndaǵy mindettemelerin oryndaýdan jaltarý maqsatynda múlkin ıelikten shyǵarǵandarǵa basa nazar aýdarylatyn bolady», - dedi Úkimet basshysynyń birinshi orynbasary.

Budan bólek, jumys istemeıtin sharýashylyq sýbektilerin taratý úshin zań jobasy ákimshilerdi tartpaı boryshkerlerge jeńildetilgen bankrottyq rásimin qoldanýdy usynady.

Sonymen qatar, «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń kodeksin qoldanysqa engizý týraly» Zańǵa salyq tóleýshilerdiń keıbir sanattaryn qospaǵanda, arnaıy salyq rejımderin qoldanatyn mıkro jáne shaǵyn kásipkerlik sýbektileri bolyp tanylatyn tulǵalar 2020 jyldan bastap korporatıvtik (jeke) tabys salyǵyn, áleýmettik salyǵyn, biryńǵaı jer salyǵyn tóleýden bosatý boıynsha túzetýler usynylady.

«Qorytyndylaı kele, zań jobasyn daıyndaý kezinde sheteldik tájirıbe paıdalanǵanyn atap ótkim keledi. Usynylyp otyrǵan bastamalar bıznes sýbektileriniń ońaltý jáne bankrottyq rásimderin qoldanýdy 32 paıyzǵa jandandyrýǵa múmkindik beredi dep kútilýde. Óz kezeginde, merzimderdi 20 paıyzǵa deıin qysqartý jáne olardy júrgizý shyǵyndaryn 40 paıyzǵa deıin qysqartý Dúnıejúzilik Banktiń »Doing Business« reıtıngindegi »tólem qabiletsizdigin sheshý« ındıkatory boıynsha Qazaqstannyń pozıtsııasyna oń áserin tıgizedi», - dedi Álıhan Smaıylov.