On jylda nesıe alǵan qazaqstandyqtar sany 7 esege ósken

NUR-SULTAN. QazAqparat – Sońǵy 10 jyl ishinde el ekonomıkasyn nesıelendirý 1,8 ese, al tutynýshylyq nesıe alý 7 esege ósti. Bul týraly Memleket basshysy Qasym-Jomart Toqaevtyń Qazaqstan halqyna Joldaýyna qatysty pikir bildirgen «Ekonomıkalyq zertteýler ınstıtýty» AQ makroekonomıkalyq zertteýler jáne boljamdaý ortalyǵynyń dırektory Qýanysh Beısenǵazın aıtty, dep habarlaıdy QazAqparat tilshisi.

«Ekonomıkalyq kredıt qurylymyndaǵy tutynýshylyq nesıeniń úlesi 2010 jylǵy 8% bolsa, bıyl bul kórsetkish 30%-ǵa jetti. Aldaǵy ýaqytta tutynýshylyq kredıtterdiń sany artsa, onda ony óteý qıynǵa soǵady. Sebebi qazirgi tańda álemdik daǵdarys saldarynan halyqtyń tabysy tómendedi. Sondyqtan aqsha-kredıt saıasaty jónindegi komıtet qurý kredıttik uıymdardyń jaýapkershiligin arttyrýǵa, sondaı-aq nesıeler boıynsha shekti mólsherlemelerdi esepteýge jáne tómendetýge yqpal etetin bolady», - dedi «Ekonomıkalyq zertteýler ınstıtýty» AQ makroekonomıkalyq zertteýler jáne boljamdaý ortalyǵynyń dırektory Qýanysh Beısenǵazın.

Budan bólek, «Ekonomıkalyq zertteýler ınstıtýtynyń» sarapshysy Strategııalyq josparlaý jáne reformalar jónindegi agenttik qurý bastamasy ýaqtyly qabyldanǵan sheshim ekenin atap ótti.

«Álemde bolyp jatqan daǵdarys Qazaqstan ekonomıkasyna áser etpeı qoımady. Sondyqtan Strategııalyq josparlaý jáne reformalar jónindegi agenttik qurý týraly sheshim búginde oryndy. Onyń negizgi fýnktsııasy - álemdik tájirıbeni zertteý, saraptama jasaý jáne strategııalyq qujattardyń iske asyrylýyn baqylaý. Atalǵan organ Prezıdentke tikeleı baǵynatyn bolady. Bul óz kezeginde mańyzdy sheshimderdi tez arada qabyldaýǵa jáne tıimdi jumys isteýge múmkindik beredi», - dedi «Ekonomıkalyq zertteýler ınstıtýty» AQ tóraǵasynyń keńesshisi Perızat Omarova.

Eske salsaq, Memleket basshysy Qasym-Jomart Toqaev Qazaqstan halqyna jyl saıynǵy dástúrli Joldaýynda Strategııalyq josparlaý jáne reformalar jónindegi agenttik qurý týraly tapsyrma bergen bolatyn.