On úsh jyl burynǵy halyq sanaǵynan beri qazaqstandyqtar 20% nemese 3,2 mln adamǵa kóbeıdi

NUR-SULTAN. QazAqparat – 2021 jylǵy sanaq pen aǵymdaǵy derekterdi eskere otyryp júrgizilgen esepteýden keıin 1 tamyzdaǵy jaǵdaı boıynsha elimizdiń halqynyń sany – 19 644 067 adamǵa jetti, dep habarlaıdy QazAqparat Ulttyq statıstıka bıýrosyna silteme jasap.

«Óńdelgen málimetterge sáıkes, 2021 jylǵy sanaqqa 19 186 015 adam qatysty. Osylaısha, 2009 jylǵy halyq sanaǵynan beri el halqy 20%-ǵa nemese 3,2 mln adamǵa ósti. Buǵan halyqtyń tabıǵı ósimi men Qazaqstan aýmaǵyna kóshi-qon aǵyny yqpal etti.

Sanaq qorytyndysy boıynsha qala turǵyndarynyń úlesi 61,2%-ǵa deıin ósti, aldyńǵy sanaq málimetterimen salystyrǵanda ósim – 5%. Tıisinshe, aýyl halqynyń úlesi 43,9%-dan 38,8%-ǵa deıin azaıdy. Qala turǵyndarynyń basym bóligi Qaraǵandy oblysynda turady – 80%, ıaǵnı 1 mln-nan astam adam. Kerisinshe, qalalyqtar sany eń az aımaq – Túrkistan oblysy. Munda barlyǵy 498 myń adam nemese oblys turǵyndarynyń 24,3%-y qalalyq jerde turady», - delingen Bıýro málimetinde.

Aldyńǵy sanaq qorytyndysy boıynsha Nur-Sultanda 619 myń adam turyp jatqan, 2021 jylǵy sanaq kezinde elimizdiń bas qalasyndaǵy halyq sany 1,23 mln adamǵa jetti.

«Ýrbanızatsııa – ekonomıkanyń ındýstrııalandyrylýy men jumys kúshiniń ónimdi salalarǵa aýysýyna baılanysty bolatyn álemdik protsess. Ádette, azamattar aýyldan qalaǵa bilim alý, mamandyǵy boıynsha jumys isteý jáne ál-aýqatyn jaqsartý úshin kóshedi. Sońǵy eki sanaq aralyǵyndaǵy kezeńde qala halqynyń eń kóp ósimi elimizdiń 6 óńirinde baıqaldy – Aqmola, Aqtóbe, BQO, ShQO, SQO, Qyzylorda oblystarynda. Al elorda halqy eki ese ósti», – deıdi QR SJRA Ulttyq statıstıka bıýrosynyń basshysy Jandos Shaımardanov.

Qazaqstandaǵy áıelder sany burynǵydaı erler sanynan basym. Sanaq qorytyndysy boıynsha olardyń sany jarty mıllıonǵa (536,3 myń adamǵa) artyq boldy. Eger paıyzben aıtar bolsaq, erler úlesi – 48,6% (9 324 840 adam), áıelder úlesi – 51,4% (9 861 175 adam). Osylaısha, Qazaqstandaǵy 100 áıelge 99 er adamnan keledi.

Sanaq 10 jylda bir ret júrgiziledi jáne belgili bir kezeńdegi halyqtyń túrli áleýmettik-ekonomıkalyq parametrlerin kórsetedi. Jınalǵan derekter usynylǵan aqparattyń tolyqtyǵy (kóshi-qon, tabys, jumyspen qamtý, neke jaǵdaıy, týý, tilderdi meńgerý dárejesi, dinge qatynasy) men respondentterdiń qamtylýy boıynsha biregeı bolyp tabylady.

Aıta ketsek, sanaqtyń qysqartylǵan qorytyndylary óńirler boıynsha 2021 jylǵy derekterdi, ıaǵnı 3 oblys bólingenge deıingi statıstıkany kórsetedi.