On mańyzdy baǵyt: Aldaǵy úsh jylda 111 myń adam sapaly aýyz sýmen qamtylady
Memleket basshysy Qasym-Jomart Toqaevtyń ınaýgýratsııasynda jarııalaǵan on mańyzdy baǵyttyń biri - aýyz sý máselesi. «Taza aýyz sý árbir úıde, árbir otbasynda bolýy mindet» dep atap kórsetti Memleket basshysy.
Qyzylorda oblysy eldimekenderdi sýmen qamtý boıynsha respýblıkada ekinshi orynda keledi. Birinshi orynda 89 paıyzben Almaty oblysy tur. Sondaı-aq, oblys - sýmen qamtamasyz etýdiń biryńǵaı operatory qurylǵan alǵashqy aımaq.
Qyzylorda oblystyq energetıka jáne turǵyn úı-kommýnaldyq sharýashylyq basqarmasynyń basshysy Medet Ýsaınnyń aıtýynsha, Qyzylorda oblysy ortalyqtandyrylǵan sýmen qamtamasyz etýde birqatar jetistikke qol jetkizgen.
«2017 jyldyń maýsym aıyna deıin Qyzylorda oblysynda oqshaý aýyz sý júıesin paıdalanatyn 10 mekeme jumys istedi. Alaıda, osy mekemeler tutynýshylardy aýyz sýmen úzdiksiz qamtamasyz ete almady. Sebebi, jergilikti jerde kásibı mamandardyń tapshylyǵy, materıaldyq-tehnıkalyq bazanyń álsizdigi, arnaıy tehnıkanyń bolmaýy, tómen jáne ár túrli tarıfpen sýmen jabdyqtaý júıesin durys paıdalanbaý sekildi problemalar aldymyzdan shyqty. Sondyqtan oblystaǵy «QazSýShar» mekemesi» Aral fılıalynyń materıaldyq-tehnıkalyq áleýetin paıdalaný úshin aýdandardaǵy lokaldy sý berýshi mekemelerdi fılıaldyń teńgerimine berip, respýblıkada birinshi bolyp óńirde biryńǵaı operator quryldy», - deıdi M.Ýsaın.
Biryńǵaı operator qurý nátıjesinde birqatar mańyzdy kórsetkishterge qol jetkizildi. Máselen, táýlik boıy sý alatyn aýyldyq eldimekender sany 88-den 145-ke deıin kóbeıdi, oqshaý (lokaldy) sý paıdalanýshylarǵa biryńǵaı tarıf bekitildi (386,95 teńge/m3), materıaldyq-tehnıkalyq bazasy jaqsardy, bastysy - tutynýshylardan túsetin aryz-shaǵym azaıdy.
«Búgingi kúni oblysta 235 eldi meken bar. Onyń ishinde, úsheýi - qalalyq (Qyzylorda, Aral, Qazaly), al 232 - aýyldyq eldi meken. Qalalyq eldi mekenderdegi halyqtyń 98 paıyzy ortalyqtandyrylǵan sý júıesine qosylǵan. Aýyldyq eldimekenderdiń 83 paıyzy toptyq sý qubyrlary jáne sý taratý júıesi bar skvajınalar arqyly ortalyqtandyrylǵan sý júıesine qosylyp, 427,8 myń adamdy nemese aýyldaǵy halyqtyń 97 paıyzyn qamtydy. Sonymen qatar, 39 eldi meken nemese 16,8% ortalyqtandyrylmaǵan júıeden (oqshaý skvajınalar, qudyqtar, tasymal arqyly) sý tutynýda. Bul negizinen halqy az aýyldar jáne onda sý júıesin salý ekonomıkalyq turǵydan tıimsiz», - dep atap ótti M.Ýsaın.
Esterińizge salaıyq, Qyzylorda oblysynyń áleýmettik-ekonomıkalyq damýynyń 2019-2022 jyldarǵa arnalǵan keshendi jospary bekitildi. Keshendi josparǵa áleýmettik mańyzy bar jalpy quny 29 mlrd teńgeni quraıtyn sýmen jabdyqtaý jáne sý burýdyń 14 jobasy engizildi. Osy jobalar iske asqan kezde 111 myń adam sapaly aýyz sýmen qamtylady.