Ómirzaq Shókeev Japonııa Elshisin qabyldady
Aımaq basshysynyń baspasóz qyzmetinen málim etkendeı, kezdesýde taraptar ekijaqty qarym-qatynastardy damytý máselelerin talqylady.
Ó.Shókeevtiń aıtýynsha, Japonııa Qazaqstan Respýblıkasy jáne sonyń ishinde Túrkistan oblysy úshin mańyzdy strategııalyq seriktesterdiń biri. Kúnshyǵys elinen óńirge gerbıtsıdterdiń úlken kólemi ımporttalady.
«Túrkistan oblysy men Japonııa arasynda ózara tıimdi óndiristik, saýda-ekonomıkalyq jáne ınvestıtsııalyq yntymaqtastyqty arttyrý úshin úlken perspektıvalar bar ekenine senimdimin. Biz birlesken jobalardy iske asyrý úshin tolyq qoldaý kórsetýge daıynbyz», - dedi ol.
Sonymen qatar oblys ákimi Túrkistan óńiriniń týrızm jáne agrarlyq ónerkásip salasyndaǵy joǵary áleýetin atap ótti. Osylaısha, aldaǵy ýaqytta sheteldiktermen ortaq múddemiz ushtasqan jobalardy iske asyrýǵa qazaqstandyq jáne japondyq kompanııalar tartylýy múmkin. Kawasaki kompanııasy Túrkistan qalasyndaǵy 50 mvt bý-gaz elektr stansysyn salý jobasy úshin óz tehnologııasyn usyndy. Óz kezeginde oblys ákimi japondyq ónim sapasyn joǵary baǵalaıtyndyǵyn bildirdi, aldaǵy konkýrstarǵa qatysýdy usynyp, sáttilik tiledi.
Aıta ketý kerek, bıylǵy jyldyń 8 aıynyń qorytyndysy boıynsha oblysqa Japonııadan jalpy somasy 513 myń AQSh dollaryn quraıtyn taýarlar ımporttalǵan. Onyń basym bóligi avtomobılder men olardyń jıyntyqtary, gerbıtsıdter men elektr quraldary. Qazaqstanda qazirdiń ózinde japon kapıtalynyń qatysýymen munaı men gaz, metallýrgııa, qarjy, taý-ken ónerkásibi, avtomobılderdi kóterme baǵamen satý, elektr baılanysy, aǵash daıyndaý jáne logıstıka sııaqty salalarda 80-ge jýyq kásiporyn jumys isteıdi.