Ómirzaq Shókeev: Shekaradaǵy kedenshiler keptelisti qoldan jasap otyr

TÚRKІSTAN. QazAqparat - Saryaǵashta Túrkistan oblysynyń ákimi Ómirzaq Shókeevtiń tóraǵalyǵymen jıyn ótti. Basqosýda óńirdegi quqyqbuzýshylyqty azaıtý men quqyq qorǵaý organdarynyń jumysyn jandandyrý, shekaradaǵy keden qyzmetin retteý máseleleri talqylandy, dep habarlaıdy QazAqparat tilshisi.

Alqaly jıynǵa oblys prokýrory men sot tóraǵasy, Іshki ister departamentiniń bastyǵy men aýdan ákimderi, basqarma basshylary qatysty. Basqosýda oblys ákiminiń orynbasary Erbol Sadyr sóz sóılep, óńirdegi jer salasyndaǵy birqatar máselerge toqtaldy. Sondaı-aq, oblystaǵy quqyqbuzýshylyq jaıly oblystyq ishki ister departamentiniń bastyǵy Q.aırat Dálbekov baıandama jasady. Oblys prokýrory Nurǵalym Ábdirov pen oblystyq sot tóraǵasy M.Baratbekov birqatar usynystar jasady. Jıynda Ózbekstan shekarasyndaǵy júk kólikteriniń keptelisi de sóz boldy. Bul jaıynda oblys ákimi Ómirzaq Shókeev saladaǵy máseleni jaýapty mamandarǵa der kezinde sheshýdi tapsyrdy.

«Shekarada júk kólikteriniń keptelisi kóp, sanıtarııalyq talaptar oryndalmaıdy. Buryn Reseıden keletin aǵash temir jolmen tasymaldanatyn. Qazir kedenshiler keptelisti qoldan jasap, temir jolmen keletin taýardy júk kólikterine tıep, elge qolaısyzdyq týdyryp otyr. Mundaı ádeıi jasalǵan qıynshylyqtar bolmaýy kerek. Shekara qyzmetin jandandyrý qajet», - dedi oblys ákimi.