Ómirzaq Shókeev «Samuryq-Qazyna» qory kompanııalary tobyndaǵy satyp alýlarda qazaqstandyq qamtý deńgeıin atady
12:34, 18 Mamyr 2012
ASTANA. 18 mamyr. QazAqparat - Ómirzaq Shókeev «Samuryq-Qazyna» qory kompanııalary tobyndaǵy satyp alýlarda qazaqstandyq qamtý deńgeıin atady.
Bul jaıynda atalǵan qordyń basshysy qazaqstandyq qamtýdy damytýǵa arnalǵan qoǵamdyq keńestiń keńeıtilgen otyrysynda jetkizdi.
«Satyp alýlardyń 84 paıyzdan astamyn holdıngtiń úsh iri kompanııalary qalyptastyryp otyr. Olar: «QazMunaıGaz», «Qazaqstan temir jol» jáne «Qazatomónerkásip» kompanııalary», -dedi ol.
Ó. Shókeevtiń sózine qaraǵanda, 2010 jyly «QTJ» satyp alýlarynda jergilikti qamtýdyń úlesi 66 paıyzdy, 2011 jyly 68 paıyzdy, al «QMG» kompanııasynda 2010 jyly 44 paıyzdy, 2011 jyly 49 paıyzdy qurady. Sondaı-aq 2011 jyly «Qazatomónerkásip» kompanııasynda jergilikti satyp alýlar úlesi 61 paıyzdy qamtyǵan kórinedi.