Ómirzaq Shókeev pen Italııa elshisi yntymaqtastyq máselelerin talqylady

TÚRKІSTAN. QazAqparat - Túrkistan oblysynyń ákimi Ómirzaq Shókeev Italııanyń Qazaqstan Respýblıkasyndaǵy elshisi Paskýale D’Avıno bastaǵan delegatsııany qabyldady. Kezdesýde taraptar oblys aýmaǵynda birlesken jobalardy júzege asyrý múmkindikterin talqylady, dep habarlaıdy QazAqparat tilshisi.

Óńir basshysy oblysta ınvestorlar úshin qolaıly jaǵdaı jasalǵanyn jáne Túrkistan óńiriniń ınvestıtsııa tartý boıynsha elimizde kósh bastap turǵanyn jetkizdi.

Búgingi tańda óńirde balamaly energııa óndirýmen aınalysatyn ıtalııalyq «Arm Wind» (ENI) kompanııasy tarapynan Otyrar aýdanynyń Sháýildir aýylynda qýaty 50 MVt kún elektr stansasynyń qurylysy júrgizilýde.

«Túrkistanǵa oblys ortalyǵy mártebesin berý qalanyń ǵana emes, búkil óńirge ınvestıtsııa tartýǵa aıtarlyqtaı serpin berdi. Bul rette ınvestıtsııalyq ahýaldy odan ári jaqsartý úshin ınvestıtsııa tartýdy júıeleý boıynsha aýqymdy jumys júrgizilýde. Sonymen qatar, jasyl ekonomıkaǵa kóshý jónindegi tujyrymdama sátti júzege asyrylyp keledi», - dedi Ómirzaq Shókeev.

Óz kezeginde Paskýale D’Avıno túrki áleminiń rýhanı ortalyǵyna sapary barysynda alǵan áserimen bólisti.

Italııa elshisi alyp qurylys alańyna aınalǵan Túrkistannyń jańa kelbeti men qalanyń mádenı-tarıhı ortalyǵynyń kórki tań qaldyrǵanyn atap ótti.

Onyń aıtýynsha, Italııa eliniń kásipkerleri Túrkistan óńirimen tyǵyz yntymaqtastyqqa, sonyń ishinde týrızm, jasyl energetıka jáne aýyl sharýashylyǵyn damytýǵa múddeli.

Kezdesý sońynda oblys ákimi uzaq merzimdi yntymaqtastyqqa jáne halyqaralyq kompanııalardyń óńirdegi bastamalaryna tolyq qoldaý kórsetýge daıyn ekenin bildirdi.