Ómirzaq Shókeev merdigerlerge qurylysqa qosymsha jumys kúshin tartýdy tapsyrdy

TÚRKІSTAN. QazAqparat - Túrkistan oblysynyń ákimi Ómirzaq Shókeev qala basshysy Rashıd Aıýpov jáne jaýapty sala jetekshilerimen birge iri qurylys alańdaryn aralap, jaýaptylarǵa birqatar tapsyrma berdi. Bul jóninde oblys ákiminiń baspasóz qyzmetine silteme jasap QazAqparat habarlaıdy.

Shahardaǵy 15 nysannyń qurylysy bıyl tolyq aıaqtalyp, paıdalanymǵa beriledi dep josparlanǵan. Barlyq qurylys alańdarynda sanıtarlyq sharalar kúsheıtilgen. Alǵashqylardyń biri bolyp, aldaǵy mamyr aıynda Tuńǵysh Prezıdent saıabaǵy men ortalyq alleıadaǵy jumystar aıaqtalady. «Áziret Sultan tarıhı-mádenı qoryq-mýzeıini» aýmaǵy abattandyrylady.

Aıta ketý kerek, Túrkistan qalasyndaǵy jańa ǵımarattardyń qurylysyna óńirler, ulttyq kompanııalar jáne ınvestorlar atsalysýda. Qalanyń ákimshilik-iskerlik jáne rýhanı-mádenı ortalyqtarynda Basqarmalar ǵımaraty, departamentter ǵımaraty, «Kongress ortalyǵy», «Nur-Sultan alańy», oqýshylar saraıy, stadıon, tsıfrlyq keńse, basseıni bar sport kesheni, smart sıtı baılanys jelileri, qalalyq saıabaq, drama teatry, «Ǵylymı-ámbebap kitaphana», «Uly Dala Eli ortalyǵy», «ıAsaýı murajaıy» boı kótergen.

Ákimshilik-iskerlik ortalyǵynda 7 ınjenerlik ınfraqurylym nysandarynyń sý, káriz, elektr, gaz, jylý júıesi men jol jáne abattandyrý qurylys jumystary kestege sáıkes júrgizilýde. Sonymen qatar «Rixos Turkestan», «Hampton by Hilton», «Nur-álem» qonaq úıleri men «Ákimshilik ǵımaratyn qonaq úı etip qaıta qurý», «Kerýen Saraı» jáne 5000 oryndyq jańa meshittiń qurylys jumystary qarqyndy júrgizilýde. Ondaǵy jumys barysyn baqylap, jumysshylarmen tildesken Ómirzaq Shókeev jaýaptylarǵa jumysty kúsheıtýdi tapsyrdy. Merdigerlerge qosymsha jumys kúshin tartýdy mindettedi.

«Qurylys barysynda eshqandaı kemshilikke oryn joq. Talap kúsheıtiledi. Jumyskerler sany jumysqa tusaý bolmasyn. Qajet bolǵan jaǵdaıda olardyń sanyn arttyrý kerek. Qosymsha jumys kúshin tartyńdar. Qaýipsizdik erejeleri durys saqtalyp, saqtyq sharalary qatań baqylansyn. Qurylystyń sapaly aıaqtalýyn, merziminde tapsyrýdy qadaǵalaımyz. Qurylys materıaldary tapshylyǵy oryn alsa, tasymaldaý jaǵyna kómek qolyn sozamyz. Qazirgi tótenshe jaǵdaı kezinde qosymsha qıyndyqtar oryn alsa, kezek kúttirmeı sheshýge atsalysamyz»,-dedi oblys ákimi.

Ómirzaq Estaıuly qaladaǵy turǵyn úı qurylysyndaǵy jumystardy da tekserdi. Ákimshilik-iskerlik ortalyǵynda 7 qabatty 24 turǵyn úıdiń qurylysy júrip jatyr. 92,8 myń sh.m, 1452 páterli jańa baspanalar zamanaýı talaptarǵa sáıkes boı kótergen. Sonymen qatar, 5157 páterli 5-7-9-12 qabatty 73 turǵyn úıdiń qurylysyn bastaldy. Jyl qorytyndysymen Túrkistan qalasynda 420 páterli 9 turǵyn úıdi paıdalanýǵa tapsyrý josparlanǵan.

Turǵyn úılerdiń qurylys barysy qatań baqylaýǵa alyndy. Jeke salýshylar arqyly 5 jáne 12 qabatty 54 turǵyn úıdiń qurylysyn júrgizý josparlanyp otyr.