Ómirzaq Shókeev maqtaaraldyqtardy sabyrǵa shaqyrdy
Vıdeoda Túrkistan oblysynyń ákimi jaǵdaıdy túsindirip, turǵyndardy úreıge boı aldyrmaı, sabyr saqtaýǵa shaqyrady.
«Ózbekstan tarapymen sóılestim. Ol jaqta qoımadan shyqqan sý toqtatylǵan. Maqtaaraldaǵy kollektordyń qýaty - sekýndyna 120 tekshe metr. Alaıda túnimen sekýndyna 180 tekshe metrden sý aǵyp, aýyldardy sý basyp qalǵan. 4 eldimekennen 5400 adam kóshirildi. Olarǵa tıisti kómek kórsetilip, qajetti zattarmen qamtamasyz etiledi. Qazir biz sý basqan óńirlerdi qaıtadan aralap, tekserip shyǵamyz. Sý basý qaýpi seıilse, halqy kóshirilgen úılerdi kúzetke alamyz. Múlkin, malyn polıtsııa qorǵaıdy. Mal men adam shyǵyny joq. Sý deńgeıi áli de kóterilse, taǵy 4 eldi mekenniń halqyn evakýatsııalaımyz. Ol - Nurly jol, Ferdaýsı, Jantaqsaı jáne Jaılybaı aýyldary. Qazir dúrligip, úreılenbeńizder. Bári retteledi. Jergilikti aýqymdaǵy tótenshe jaǵdaıdy retteýge oblystyq tolyq múmkindigi bar», - deıdi Ómirzaq Shókeev.
Esterińizge sala keteıik, 1 mamyrda Sardoba sý qoımasy bógetin sý shaıyp ketýine baılanysty Ózbekstannyń Syrdarııa oblysyndaǵy eldimekendi sý basty.
Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Maqtaaraldaǵy ortalyq kollektordan sý tógilip, Jeńis, Jańa turmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avtomobıl jolyn sý basyp, kólik júre almaýda.
Sondaı-aq Túrkistan oblysynda sý tasqyny qaýpi tóngen 3 aýyldyń halqy evakýatsııalanyp jatyr.