Ómirzaq Shókeev halyqtyń ótinish-shaǵymyn qabyldaıtyn bólim qurýdy tapsyrdy
Alqaly jıynda oblys ákimi Ómirzaq Shókeev Joldaýda aıqyndalǵan baǵyttarǵa toqtalyp, naqty tapsyrmalar berdi.
«Kóptegen aryz-shaǵymdardy ońtaıly sheshýde «Azamattar ótinishterin baqylaý» bólimin qurýdy tapsyramyn. Atalǵan bólim barlyq deńgeıdegi aryz-shaǵymdardyń merziminde jaýap berilýine baqylaý jasaıdy. Halyqpen baılanysty nyǵaıtýda qoǵamdyq baqylaý jáne partııa belsendileri men sheneýnikterdi baǵalaý tetigin uıymdastyra bilýimiz kerek«, - dedi Túrkistan oblysynyń ákimi Ómirzaq Shókeev.
Jalpy, Túrkistan oblysynda aýyl sharýashylyǵy, jeńil ónerkásip túrleri keńinen damyǵan. Eksporttyq potentsıal óte joǵary. Osy rette Ó.Shókeev tıisti sala basshylaryna «Kazakh Invest», «Kazakh Tourizm» mekemeleri uıymdastyratyn halyqaralyq kórmelerge turaqty qatysyp turýdy júktedi.
Sonymen qatar, oblys ákimi Elbasy tapsyrmasyna sáıkes «Aýyl el - besigi» jobasy qarqyndy júzege asyrylyp jatqanyna toqtaldy.
«Bıyl Túrkistan oblysynda 7 eldi mekenniń máselesin sheshýge 4 mlrd teńge jumsaldy. Nátıjesinde 112,8 shaqyrym jol tóselip, 7 bilim, 1 sport jáne 5 mádenıet nysany jóndeýden ótetin bolady. Joba aıasynda 2020 jylǵa 15 eldi mekende 114 jobany iske asyrýǵa 4,8 mlrd teńge baǵyttaý josparlanýda», - dedi Túrkistan oblysynyń ákimi.
Sondaı-aq, óńir basshysy ataýly áleýmettik kómek máselesin atap ótti. Atalǵan baǵdarlamany tsıfrlandyryp, ataýly kómek alýshylar bazasyn jasaqtaýdy tapsyrdy.
Aktıv otyrysynda máslıhat depýtattary, ardagerler, zııaly qaýym, qoǵamdyq uıym tóraǵalary Joldaýda atalǵan mindetterge toqtalyp, óz pikirlerimen bólisti.
Ómirzaq Shókeev qala, aýdan ákimderi men qalalyq qurylymdardyń basshylaryna turǵyndar arasynda keń aýqymdy aqparattyq-túsindirý jumystaryn júrgizýge, ózderine júktelgen mindetterdi ýaqytyly ári sapaly oryndaýǵa tapsyrma berdi.