Ómirzaq Shókeev «Djıro d'Italııa» jeńimpazyn qazaqsha kúreske shaqyrdy

ASTANA. 6 maýsym. QazAqparat - Búgin "Samuryq-Qazyna" Ulttyq ál-aýqat qory" AQ basshysy Ómirzaq Shókeev «Pro Team Astana» komandasynyń veloshabandozy Vınchentso Nıbalıdi qabyldap, «Djıro d'Italııa-2013» kópkúndigindegi jeńisimen quttyqtady.

Onyń aıtýynsha, velosport qordyń demeýshilik kómek berýiniń negizgi baǵyttarynyń biri bolyp tabylady.

"Biz komandany 2007 jyldan beri qoldap kelemiz. Ol bizdiń eń sátti jobalarymyzdyń biri bolyp otyr. Osy ýaqyt ishinde komanda barlyq tıtýldardy ıelenip úlgerdi. "Djıro d'Italııa-2013» kópkúndigindegi jeńis asa jaǵymdy boldy. Búkil el komandanyń jetistikterine kóz tigip otyr", - dedi Ó.Shókeev.

Qor basshysynyń atap ótkenindeı, velokomanda "Astana" prezıdenttik kásibı sport klýbynyń "marjany" bolmaq. Sóz arasynda ol klýbqa halyqaralyq arenada el namysyn sátti qorǵap júrgen komandalar men sportshylar kiretinin aıtty.

"Bunyń quramyna ulttyq sport túrlerin de engizemiz. Mysaly qazaqsha kúres sporty. 30 maýsym kúni qazaq kúresinen «Qazaqstan barysy» týrnıriniń fınalyn ótkizemiz. Oqıǵa asa qyzyq. 30 myń adamdyq stadıondy toltyryp, búkil el aýmaǵyna teledıdardan tikeleı efır kórsetilimin uıymdastyramyz. Fınaldy tamashalaýǵa shaqyramyz. Bastapqyda el ishinde damytyp, keıin bul sport túrin halyqaralyq arenaǵa da shyǵarý josparda bar", - dep túıdi sózin Ó.Shókeev.