Ómirzaq Shókeev Arystaǵy qurylysty aıaqtaý boıynsha tapsyrma berdi

TÚRKІSTAN. QazAqparat – Túrkistan oblysy ákimi Ómirzaq Shókeevtiń tóraǵalyǵymen Arysty qalpyna keltirý jumystaryn aıaqtaý boıynsha apparattyq jıyn ótti, dep habarlaıdy QazAqparat tilshisi.

Basqosýǵa sektorlarǵa jaýapty barlyq oblys ákimdiginiń ókilderi, Túrkistan oblystyq basqarma basshylary men aýdandyq ákimdik mamandary qatysty.

Kezdesýde oblystyq Qurylys basqarmasynyń basshysy Erbol Ahmetov jarylys bolǵan qaladaǵy qurylys-jóndeý jumystary jaıynda baıandama jasady.

Onyń sózinshe, 7,8,9,10 jáne 11-shi sektorlarda jalpy zaqymdalǵan 2975 úı bar. Búgingi kúnge osy sektorlarda 94 merdiger kompanııa, 180 tehnıka jáne 2505 jumysshy jumyldyrylǵan. Al, Túrkistan oblysyna tıesili 7-shi sektorda zaqymdalǵan 478 úı ornalasqan. Búgingi kúnge jóndeýdi qajet etetin jeke jáne kópqabatty turǵyn úılerde jumystar aıaqtaldy. Jańadan qurylysy júrgizilip jatqan 100 úıdiń bárinde tıisti jumystar júrgizilýde.

Sonymen qatar, Shyǵys Qazaqstan oblysyna qarasty 8-shi sektorda zaqymdalǵan 537 úı bar bolsa, jóndeýdi qajet etetin 5 úıdiń syrtqy jáne ishki árleý jumystary júrgizilýde.

«Nur-Sultan qalasynyń 9-shy sektorynda 696 úı bar. Búgingi kúnge jóndeýdi qajet etetin 249 jeke jáne 31 kópqabatty úıdiń syrtqy jáne ishki árleý jumystary júrgizilýde. Jańadan qurylysy júrgizilip jatqan 160 úıdiń kirpishin qalaý jumystary júrgizilýde. Aǵymdaǵy jyldyń 20-qyrkúıeginde sektordaǵy barlyq úılerdi paıdalanýǵa tapsyrý josparlanýda. Sondaı-aq, Shymkent qalasyna tıesili 10-sektorda – 636 úı ornalasqan. Búgingi kúnge jóndeýdi qajet etetin 10 úıdiń syrtqy jáne ishki árleý jumystary bar. Jańadan qurylysy júrgizilip jatqan 56 úıdiń 4-i úıi paıdalanýǵa tapsyrylyp, qalǵan úılerde kirpish qalaý jumystary júrgizilýde»,-dedi Erbol Ahmetov.

Oblystyq qurylys basqarmasy basshysynyń sózinshe, Batys Qazaqstan oblysyna tıesili 11-sektorda 627 úı bar. Búgingi kúnge jóndeýdi qajet etetin jeke jáne kópqabatty turǵyn úılerde jumystar aıaqtalǵan. Jańadan qurylysy júrgizilip jatqan 13 úıdiń 4-i paıdalanýǵa tapsyrylyp, qalǵan úılerdiń bárinde kirpish qalaý jumystary júrgizilýde. Aǵymdaǵy jyldyń 20 qyrkúıeginde barlyq úılerdi paıdalanýǵa tapsyrý josparlanǵan.

Jıyndy qorytqan Túrkistan oblysynyń ákimi Ómirzaq Shókeev barlyq sektor jaýaptylaryna qurylys jumystaryn ýaqytynda aıaqtaý qajettigin naqty tapsyrdy.