Ómirzaq Shókeev ardagerlermen kezdesip, Túrkistandy túletý jaıyn aqyldasty

TÚRKІSTAN. QazAqparat - Túrkistan oblysynyń ákimi Ómirzaq Shókeev óńir ardagerlerimen kezdesti. Basqosý barysynda el birligi men jastar tárbıesi, eldiń áleýmettik jaǵdaıyn kóterý men Túrkistandy túletý máseleleri sóz boldy, dep habarlaıdy QazAqparat tilshisi.

Aımaq basshysy eldiń rýhanı damýy úshin aldyńǵy tolqyn aǵalardyń úlesi mol ekenin atap ótti.

«Elbasymyzdyń «Bolashaqqa baǵdar: rýhanı jańǵyrý», «Uly dalanyń jeti qyry» atty baǵdarlamalyq maqalalary boıynsha oblysta naqty jumystar atqarylyp jatyr. Osy maqalalary arqyly tereńge tamyr tartqan tarıhymyzdy, ulttyq bolmysymyzdy qadirleý kerektigin aıtty. Sol izgi qasıetterdiń biri - qazynaly qarttardy qurmetteý. Al aqsaqaldarymyz urpaqqa ónegeli áńgimesin aıtyp, eldi birlikke, yntymaqqa shaqyrýy tıis», - dedi Ómirzaq Shókeev.

Jıynda oblystyq ardagerler keńesiniń tóraǵasy Jeńisbek Máýlenqulov uıymnyń negizgi maqsatyna toqtaldy.

«Ardagerler uıymynyń 168 múshesi bar. 33 jyldyq tarıhyn aýyz toltyryp aıtýǵa bolady. Ardagerler uıymynyń maqsaty - el tatýlyǵyn tý etip, urpaq tárbıesine kóńil bólý. Ardagerlerdiń áleýmettik qamsyzdandyrylýyn járdem berý. Sondaı-aq, sizge Túrkistandy túletýde, Túrkistandy kórkeıtýde qajyr- qaırat tileımiz», - dedi Jeńisbek Máýlenqulov.

Kezdesýde birqatar ardagerler Elbasy maqalasy jaıynda, óńir ahýaly haqynda, sondaı-aq uıym múshelerine qajetti ǵımarat, kólik, qoldaý jaǵyn sóz etti. Óz kezeginde oblys ákimi barlyq qoldaý kórsetiletinin jetkizdi.

«Halqymyzda «Yntymaq - buzylmaıtyn qorǵan, Qosylyp ekken aǵash - orman» degen maqal bar. ıAǵnı, ár isti kelisip isteı bilsek, urpaqtar arasynda sabaqtastyq úzilmese, elimiz órkendeıdi. Kezinde Tóle, Qazybek, Áıteke syndy kemeńgerlerimiz eldi uly murat jolynda toptastyryp, bátýaly oılaryn aıtyp, memleketke qyzmet ete bilgen. Sizderge ǵımarat, kólik turǵysynan tıisti qoldaý kórsetiledi. Túrkistandy túletý jolynda birige eńbek etemiz», - dedi oblys ákimi.