Ómirlerińe nemquraıly qaramańdar - Arystanbek Muhamedıuly

ASTANA. QazAqparat - Qazaqstan Respýblıkasy Mádenıet jáne sport mınıstri Arystanbek Muhamedıuly jas sportshylardy óz ómirlerine nemquraıly qaramaýǵa shaqyrdy. Mınıstr mundaı pikirdi Almatyda ótken IV Jastar sporttyq oıyndary kezinde kóz jumǵan Dana Ahmetovaǵa qatysty bildirdi, dep habarlaıdy QazAqparat tilshisi.

«Men áke retinde, mádenıet jáne sport mınıstr retinde kóp oılandym jáne jas sportshylarǵa aıtarym, sender jassyńdar, jalyńdap tursyńdar,  alaıda óz ómirlerińe nemquraıly qaramańdar degim keledi. Biz barlyǵymyz senderdiń jetistikterińe qýanamyz, alaıda eshkim ata-anasyna balasyn qaıtaryp bere almaıdy. Osyny esterińnen shyǵarmańdar», - dedi mınıstr Feısbýktegi paraqshasynda.

Ol mınıstr retinde sporttyq jarystarda mundaı oqıǵalardy boldyrmas úshin uıymdastyrýshylarǵa tıisti talap qoıýǵa ýáde etti.

«Jarys kezinde adamǵa túsetin júkteme men qaýipterdi nazarǵa alý qajet. Biz úlkender balalarymyzdyń ómirine nemquraıly qaramaýymyz kerek» ,-  dedi mınıstr.

Onyń sózine qaraǵanda, daryndy jas sportshy Danamen qoshtasý Soltústik Qazaqstan oblysyndaǵy Toqýshy eldimekeninde ótedi.

Sondaı-aq mınıstr Dananyń daryndy sportshy ekendigin aıta kele, onyń maýsym bastalǵaly beri Jastar oıyndarynyń shossedegi  saıysynda - kúmis, trektegi saıysta - 2 qola medalin ıemdengenin eske aldy.

Eske sala ketsek, Soltústik Qazaqstan oblysynyń 17 jastaǵy velosıpedshisi Dana Ahmetova 29 maýsym kúni Almaty qalasynyń №7 aýrýhanasynda kóz jumdy. Ol 23 maýsym kúni  IV Jastar sporttyq oıyndarynda esinen tanyp qulaǵan.

Buǵan deıin Dananyń ólimine ne sebep bolǵanyn jazǵan bolatynmyz.